Пици-палакст/Колмоцесь курок кенери

From Wikisource
Jump to navigation Jump to search
Колмоцесь курок кенери  (1930) 
by Дуняшин, Алексей Васильевич
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 120—122
[ 120 ]

КОЛМОЦЕСЬ КУРОК КЕНЕРИ


С
ЕДЕЕМ ПРОК ойсэ вадевсь, мелезэнь паро!

— Мезе истя, мезе? Месть кеняркшнат?

— Мезе, брат, а кеняркшнан, кастано кополсо, прок рельса ланга молить тевенек.

— Месть истя лабурдат? Исяк некак седе позда куролинзеть.

— А ёматано! Истят ломатне марто васов пачкотьтяно!

— Кить истя не ломатне?

— Истят ломатне марто социализмантькак сроясынек, робочейтне марто смычканть кемекстасынек и...

— Марика... — ялганть кежензэяк састь. — Марика, тумонь пря, кортака эно ломанькс. Кить истят не ломатне?

— Колияк зняро эзинь путне Вишка-Толкан ланкс. Ламо тосо паро ломатнеде, газетсэяк уш „прославили“ сынст, но Гарянь Вася... но Гарянь Вася!..

— Мезе — Гарянь Вася? Некак сонзэ паро ломанекс думат ловноманзо?

— А тон думить? Те вана ломань!..

— Да, те уш ломань... — Ялганть пеензэ чикорк мольсть. Те ломанденть благой кискаяк арась В.-Толкан велесэ. Те ломанесь советэнь властенть поза марто симевельсе... те ломанесь понксь башка обложенияс — 230 целковой налог бухацть тензэ... Те ломанесь индустриализациянь заёмонь явшицятне ланкс кисканзо узавтызе...

— Э, ялга! Тон ламо а кортат и... седеяк аламо содат. Гарянь Вася аволь ломань — клад! Гарянь Васянь пря поцонзо аволь удем — сырьне.

— Эщо мезеяк ёвтат?

— Ёвтан, ялга, ёвтан! Ламо кой мезе ёвтан! Кувать кашт молинь... течи потмом чамдаса. Кунсолок, ялга.

[ 121 ] ... — Кото иеть теде икеле Гарянь Вася урьвакссь... Пас макссь тензэ омбоце козяйка, козяйкась тусь мартонзо тейтерьть: вейкесь уш невесталь, омбоцесь пель-невесталь, колмоцесь эщо вишкинель. Тейтерьтнеде башка козейкась тусь Васянень приданка — скал, утом, кудот-кардаст, жнейка ды ламо лия ули-паро. Васянь мельс пек-тусть... улись-парось ды покш тейтересь... А козейкась, кевкстьтядо? Козейкась — кадык. Вася — ломанесь аволь пеле-преве. Сон содызе ки ланкс урьвакстомс. Сонзэ брат, а манясак. Да.

... — Урьвакссь Вася. Эрясь-айшь аламос и кармась сокарямо од семиянзо: васняяк микшнинзе од козейканть приданоензэ. Козейкась валгак эзь ёвта тень каршо. Вася — мирдезэ. Сон содасы, кода ветямс хозяйстванть. Ков чи эри Вася од семиянть марто — седея-устави эрямо Вася. Покш тейтересь — куть ков тейтерк ульнесь. Эссе обидя пазось тейтеренть — макссь тензэ мазы чама, паро рунго. Вася кармась тейтеренть круцеме: „Мать ваксозон... цеця лацо наряжатан...“ Донизе тейтеренть. Эрямо оля эзь кат тензэ. Оргоць тейтересь кудостонть ды тусь мирьденень.

... — Кадовсь кудонтень омбоце тейтересь. Кавто иеть учось Вася тейтеренть касуманзо. Учизе. Ней Вася машты ко ёндо те тевентень кундамс: кучсы тейтеренть тинге пирев коромонь кис, сонсь салава мальганзо моли и карми круциманзо: „мать, келя, дочам, ваксозон куть весть... Эрямот паро карми улеме. А мадят — берянь теят...“ ...Эзь мать тейтересь ваксозонзо. И, виде паро, эстензэ берянь тейсь: омбоце ие ва уш сэвезь-сэви эйсэнзэ Вася. Кизэнь перть робутавцы, сёксня паньсы кудостонть ков понксь. Авась каиксэль вал пиштяка тейтеренть кис, Вася кежиявць аванть ланкс и чавизе пеле-куломс. Эрямозояк майшь тейтеренть, авантькак а седе тантей эрямозо. Авась тейтерензэ марто туиксэль, а туят: Вася весе улинзэ-паронзо сёрмацтызе цёранзо ланкс и теевць явомань конэв—акт, а сынсь эрить вейсэ. Тейтеренть кискадо беряньстэ анды, сонсь эрьва чистэ куроли эйсэнзэ...

...Истямо ломанесь — Гарянь Вася. Сонзэ удеметне марто кой-мезе тейдяно. Вишка-Толканонь эрямонзо можна мекей ланк велявтомс. Истямо ломанесь Гарянь Вася...

[ 122 ]< Окончание на стр. 122 которая отсутствует в скане книги. — примечание редактора Викитеки. >