Пици-палакст/Пачк потявтума скал

From Wikisource
Jump to navigation Jump to search
[ 123 ]
ПАЧК ПОТЯВТУМА СКАЛ


< Начало на стр. 123 которая отсутствует в скане книги. — примечание редактора Викитеки. >

[ 124 ] — Кадык кудот! — мери тень ломанесь. — Ютак азё светканть. Тия-тува якак иешка. Ули истямо тарка. Тосо эри пачк-потявтума скал. Чинек-венек ловсо максы те скалось. Карминьдерят симеме те скалонть ловсодонзо — валдомить преветь, панжовить сельметь. Лиякс кармат ваномо эрямонть ланкс. Лиякс эрямояк тонадат.

Истя мутинзе превень те ломанесь, истя мутинзе — эсь прям содамодонзо лоткинь. Мерят, прок удемень паргом комавтовсь. Ярсамоськак тень лоткась молемадо. Удомаськак шайтят ков тусь эйстэнь. Бути кодаяк матидеват — стака онт куроттадызь. Мень бути кискашка крисат ды раужо атякшт куролить эйсэть. Сыргозят — прок баня-полок ланксат: ливезь-пар поцат.

Эзинь кирьть куватьс. Кудон-чинь кадынь шабран кедь ланкс, моньсь туинь. Пачк-потявтума скалонь вешнеме туинь.

Икелейгак понгинь Эрзя-мокшонь окрукс, Атяшева велес. Районной велесь.

Каршозон моли од цёрыне — комсомолец мерить тензэ.

— Аштек, думан, кевстьса. Паряк тень ёвты мезеяк.

Кевкстия цёранть. Сон варштась лангозон кеместэ и мери:

— Мень тесэ пачк-потявтума скалт, коли минсь букадояк дурактано!..

— Мекс истя? — таго кевстия.

— Мекс, мекс! Кундык теке валонть и порят прок килат. Тесэ, мери, тевенек скалтомояк курок вазыить...

— Ды кода истя? — таго вал каинь цёрантень.

— Истя самай! — мери цёркась, — округонть келес моли нацменизация. Минек комсомолонь райкомонть секретарезэ ульнесь эрзя — Кулагин ялгась. Робутась срасть вадрясто. Улко сась миненек окружкомонь член Наумов и усксь мартонзо лия секретарь — рузонь тейтерь... Госткинань.

— Те, нать, берянь?

— Ки мери — берянь? Тейтересь прок вадря: тетязо кемень иеть служась жандармакс. Госткина тетядонзо васов эзь тук (истя корты Ардатовсто кучозь сёрмась). Комсомолс совась ансяк карьерань кис. Наумов шнызе минек районов секретарькс.

[ 125 ] — Ну — думан эсь пачкан — тесэ пачк-потявтума скалось ве чияк а эряви. И кода истя? — таго тыки думан: моли нацменизация, и секень вакска эрзянть таркас кучить руз. Ды кодамо мик те рузось!..

Туинь Атяшевасто. Понгинь В-Мывальце велес. Кевкстинь таго ломань: эзь вачкоте сынст велес пачк-потявтума скалось.

Ломанесь тондавсь кодамо бути чебурдашной: сельмензэ тетькинзе лангозон, кургонзо прок ветьте пештизе. Азё кортак истямонть марто! Сельгинь мастор ваксс — туинь вакстонзо.

Совинь сельсоветс. Тосо самай заседания мольсь. Арынь кенкш ланкс, кунсолан. Кодамо бути ломань столенть экшсэ корты:

— Семенной фондонть, атят, пурнамс а эряви! Кинень сон эряви? Беднотантень? „Бабань пеште“ тензэ. Семфондось миненек не выгодна. Советэнь властенть аместь кунсоломс. Сон ансяк розори эйсэнек.

Кунсолынь те ломаненть — дивинь. Мон монсь активистэкс колияк араселинь. Эринь каськасо чеерькс: содынь ансяк эсь норам ды кардаз-ушом. Лезэнть пек покш эзинь кант. Но советэнь властенть истя сялдомс ды народонь сельме икеле — келем аволь велявтовт.

— Ки истя те ломанесь? — кевкснян вакссон аштиця цёратнень.

— Те? Те — од советэнь член Макеев Захар.

— Превстэ, нать, лиссь сон?

— Эзь думсеяк мик! Течи сон кода бути эщо чевцтэ корты. Лиясто „ава лем“ марто позорямо карми. Ве кампанияяк апак сёвно а менсти: кургозо шапкашка, киненьгак а онкстявияк.

— Кода эно истямось понксь советс?

— Кода... муевсть парт ломать, конат кепедизь кедест кисэнзэ.

Ну, думан эсь пачкан, те велестэнть пачк-потявтума скалонть а мусак. Шлямка тестэ седе курок.

Не кавто велетнеде мейле кармась маштомо надёшкам пачк-потявтума скалонть ланкс, но сельмень кода бути лиякс ваномо кармасть. Лия превть косто бути кармасть каятомо пря-потмозон.

[ 126 ] Вачкотинь Кочкуровонь районс, Кацялай велес. Озынь школонть ваксс оймсеме. Думан:

— Кинь ней кевстемс? Ки ёвтасы тень, косто муемс пачк-потявтума скалонть, конань ловсодонзо мейле тонадан лиякс эрямо.

Юты вакскан од цёрка. Вадря цёркась. Сельмензэ пачкат ютыть. Пшкадинь тензэ. Озась ваксозон.

— Тон аволь ошсто? — кевксни эйсэнь.

— Аволь, — мерян тензэ. — Мейсь эряви теть ошонь ломанесь?

— Ды пек уш, мери, рудазось ламо минек велесе. Газец вана, мери, сёрмадынь заметкат. Кучомс а ки марто. Почтась сы ниле чинь трокс.

— Кодат истят не тевтне, цёрка?

— Кавто-колмо валсо а ёвтневить. Кочкинек тедиде од совет. Председателькс понксь Шугаев. Членкс понксть а сондензэ парт. И кармась робутамо од советэсь. Бедной ломатнень сюрост кармась маштомо. Сынь думасть туеме робутакшномо. Мольсть советэв удостоверениянь кис — и получасть торла.

— Конёвонок арась! — мери секретаресь Саркин.

— Эно ней вачо нать куломс тенек? — кевкснить ломатне.

— Минек те не касается! — мери сельсоветэсь.

Омбоце примерэсь истямо. Кавто-колмо бедной ломать хлопочакшность вирь. Но од советэсь истя „стараясь“ не ломатнень кис, истя „стараясь“, — те виренть получизе кочксима прававтомо кулак Салдин М. И.

Те эщо аволь весе. Явшесть вирь. Весе получасть вирь: манашкатнеяк, церькуваськак, Шугуев сонськак, школось эзь получа. Школось, келя, аволь общественно-надобной тев! (чаркодиде?) Эйкакшнэ школсонть телень перть „полозат меньшесть“ якшамодонть. Телень перть рунгост-ловажаст порнесь якшамось.

Вана кодат тевть эрить мастор ланксо, а тон якат велетне ланга ды пачк-потявтума скал вешнят. Месть лызамс тевтеме! Кинень лезэсь тень эйстэ? А эстеть а ломаннень. Эрямосонть, мери, шайтяндояк ламо берянесь. Ливтемс сонзэ мотькензэ ды лиякс нолдамс эрямо ладонть. Комсомолось, мери, аволь тынк лацо тонавты эйсэнек эрямо. А тон — пачк-потявтумо скалдонть...

[ 127 ] Туинь цёрканть вакска и кувать тень паметь эзь са. Кода истя? Комсь иесэ од цёра истя лац корты, а мон, ниленьгемень иесэ атя, пейдимань пинге печтян... Эрян мон аволь чеерькс — модасо суксокс эрян, светэнтькак а некшниса ды моньгак кияк а некщнисамам.

Истя эринь. Да. Но седе тов истя эрямо а карман.

Кодамояк пачк-потявтума скал арась, но ютыця ломанесь эзимем маня. Мон лисинь эсь лукшом поцто ды ютынь народ юткова. Лия сельмсэ карминь ваномо эрямонть ланкс. Лия превде ды арьсимадо пешкець пря потмом.

Пандя моданть чиниявтомс ды менеленть коптямс. Масторонть ланксо ламо рудазось. Ломанень седейтнень ланксо ламо чекересь. Шлямс-нардамс эрявить сынст!

Эли мон а ломанян? Эли а маштувиксан кодамояк робутас? Течики туян коллективс! Вейсэ-лувсо, ве мельсэ карматано тосо сроямо лия эрямо. Ансяк коллективстэ, нать, муса пачк-потявтума скалонть, коната чинек-венек максы вадря превть, вадря тевть и вадря эрямо.

Ламо монь кондятнэде. Весе сынь аволь эрить — ансяк лексить. И весе сынь сестэ ансяк кармить эрямо ломанькс, зярдо лисить эсь лукшост поцто монь лацо.