Пици-палакст/Коногон ацирьгали

From Wikisource
Jump to navigation Jump to search
[ 112 ]
КОНОГОН[1] АЦИРЬГАЛИ


У
ЛИ ВЕЙКЕ анекдот. Каткась сырьгась наступленияс чеерень царстванть ланкс. Талакацть чеерьтне. Месть тейнемс? Кода ванстомс эсь прянть? Кода пирямс каткань кинзэ? Муевсь вейке превей чеерь.

— Мон, келя, ялгат, ванстатадызь: шачтан пандо и эйсэнзэ пиряса катканть кинзэ.

Тусь чеересь каткань каршо, маць кинть ланкс и кармась пандонь шачтомо. Кармась чеересь сэставтомо и эзь фатяяк, кода каткась мольсь эйзэнзэ. Каткась содазь уш месть тейни чееренть марто. Кадовсть чеерьстэнть ансяк пона клоккеть.

Те — анекдот, ульнесь, мерить, пек умок. Но тень ёнов яходиця ули вейке история, кона ульнесь аволь умок. Те аволь ёвкс, аволь анекдот — алкуксонь тев.

Меля, майстэ, Гаврилов Г. прядызе Барнаулонь совпартшколанть. Прядызе сон ёнсто, макссть тензэ, аттестат: вадрясто, келя, тонавтнесь, можна сонзэ аравтомс обществоведэкс.

Сась Гаврилов Г. Новосибирскоев. Совась крайкомс эрзя-мокшонь секциянтень. Невтизе эсь прянзо ды документэнзэ секретарентень. Тусь мельс цёрась. Аравтызь цёранть тевс — „Од эрямонь“ редакциясо робутамо. Тевесь покш ды ответственной, но Гаврилов ланкс надиясть. Цёрась тонавтозь, кадык лиси эйстэнзэ газетэнь роботник.

Истя думась секциясь, истя арьсесь редакцияськак, но тевесь лиссь аламодо лиякс. Гаврилов, нать, шачсь покш тевень тееме, думась: сонзэ вицтэ редакторкс аравцызь, но цёранть аравтызь ансяк сотрудникекс.

[ 113 ] Гавриловонь мельс те эзь тук. Гаврилов Г. а вечксы састо якамонть. Састо молезь — социализмантень кувать а пачкодят. Гаврилов Г. кармась кополсо ардомо, ансяк кинть кочкась нолажа.

Кармась Гаврилов Г. „робутамо“ редакциясонть. Икелензэ аравць цель: улемс редакторонть заместителекс седе курок. Неень замонть паневтемс. Кармась Гаврилов Г. „робутамо“ — склокань ветямо. Гаврилов паро тевень таркас, прянзо ланкс стявтызе редакциянть, ташто роботникнень вейке-вейке марто сёлгавтынзе. Ковонть ютазь ансяк фатясь редакциясь, кодамо ломанесь Гаврилов Г. Ковдо мейле чаркодинзе редакциясь. Гавриловонь „покш“ планонзо и кучизе сонзэ... шумбрасто ды виевстэ мекей Барнаулов.

* * *

Тусь Гаврилов Г. Новосибирскойстэ — прок вец ваясь. А куш, а каш. Секень вант аволь маряяк эйстэнзэ Сибрайкомонь эрзя-мокшонь секциясь, аволь садеряй „Од Эрямос“ вейке сёрма. Аволь пек покш те сёрмась, кучизь сонзэ „Труд“ комунасто... Сась минек комунас, — сёрмаць селькорось, — те кизна эрзянь интелегент Гаврилов Г. и мери: „нельзя ли эрямс аламос мартонк? Должность костояк эзинь муе, вачо эрямось пек а мазы.“ Жализе ломаненть комунась: эряк, келя, коли ярсамс тенть амезде. Эрясь Гаврилов комунасонть ковшка, невтизе прянзо паро ёндо, совась коммунантень членэкс. Аламос эрязь, кочкизь сонзэ председателекс. И кармась Гаврилов невтеме паро ёнксонзо: нузякстояк нузякс, хозяйствань ветямо овси а машты ды а вечксыяк. Артневель ансяк ошов ды получаволь ярмак. Комунанть виде кистэнзэ пурдызе; комунась кирць ламо убыткат: наксаць кснавост, ёмась турнепсэст, ламо кой-мезе ёмась. Комунартнэ вансызь Гавриловсто меньгак толк а лиси, ёртызь председательстэ. Гаврилов кежиявць, кармась комунанть калавтомо. Од комунартнэнь кармась узавтнемест Атяшкинэнь ды Ермошкинэнь ланкс (не ломатне комунанть васень организатортнэ). Прянзо ланкс стявтызе комунанть Гаврилов. Секень вант калады комунась. „Панинк Гавриловонь, — сеери селькорось, — розорясы комунанть!“

[ 114 ] Истя вана таго лись ланкс Гаврилов Г. Но сон прянзо покорс а макссы. „Од Эрямос“ сась кежей опровержения. Эйсэнзэ сёрмадозь цела обоз мазы валт — и вейкеяк вал арась, конаньсэ вельтяволь Гавриловонь чумозо. Опровержениясь тусь сёрмань паркс.

Теде мейле Гаврилов Г. лиякс кармась „боруцямо“ „Од Эрямонть“ каршо. Кучсь сёрма рузонь газетс — „Советской Сибирьс“. Те сёрмасонть Гаврилов невтизе, кодамо сон „пекшизе комунистэсь“, кода васов тусь сон комунистэнь линиянть ланксто. Гаврилов сёрмады: „Од Эрямосонть“ арась меньгак лад. Тосо болута, сёрмадыть эйзэнзэ ансяк Россиядо, газетсэнть арась сёрмань парго, заметкатнень кувалт меньгак расследованият а ветить, газетсэнть арась меньгак самокритика, редакциясь пели самокритикадонть.

Кода ловнат не материалтнэнь — череть дубушки сти. Ки жо те ломанесь — Гаврилов? Комунист? Да. Мекс эно истя маньши? Кода келезэ велявтови истямо клеветань сёрмадомо? Секс, нать, и велявтови, што сон аволь комунист, сон — беряньстэ пидезь интелигент-карьерист, коната васня валонть ёвтасы, васня тевенть тейсы — мейле уш думазеви кувалмаст.

Алкукс ли истя ашти тевесь? Алкукс ли пурдась кистэнзэ „Од Эрямось“? Варштатанок тевенть ланкс аволь Гавриловонь сельмсэ. Конат ловнокшныть „Од Эрямонть“, сеть содасызь, кодамо киява моли те газетэсь. Кавто иес те газетэсь кайсь и сэрьс и тевс. Меля, аволь ульгак „Од Эрямось“, Сибирень эрзя-мокшотнень ютксо беряньстэ ютавтоволь сюронь анокстамось, аволь уле меньгак самокритика, конань овси эсьсе нее Гаврилов Г. „Од Эрямонть“ кайсь авторитетэзэ аволь ансяк Сибирьсэ. Секс самай Россиястояк ламо сёрмадыть те газетэнтень. Россиясо эриця эрзя-мокшотне „Од Эрямонть“ вельде ёвтнить сибиреньсетненень, кода эрить сынь, кодат хозяйственной достиженияст. Истя думатано минь, Россиясо эриця эрзя-мокшотне.

„Од Эрямонть“ улить асатыкс тараканзо. Од эщо газетэсь ды роботникнэяк эйсэнзэ от. Секс самой „Од Эрямось“ сех ламо мелявты самокритикадонть, сондензэ пек ве газеткак а сеери эсь ильведевкстэнзэ, ве газеткак а печаты зняро заметкат эйстэдензэ. Тень кис эряви шнамс „Од Эрямонть“, те сонзэ паро ёнксозо.

[ 115 ]

* * *

Минь пееттяно ёвкснэнь ды анекдотнэнь ланксо. Минь истяжо пееттяно Гавриловонь кондят „геройтнень“ ланксо. Ки чумось Гавриловонь кондятнэнень, коли сынст сельмсэ „саразонь курцть“, пряст поцо наксадо оргат? Ки чумось, коли валост-тевест молить мекейланк.

Истят ломатнеде, конат карьеристэнь тевсэст тулкадить сынсь эсь пряст партийной ды общественной кинть ланксто, мерить отщепенецт, истят ломатне козоньгак а кельгить робутамо. Истят ломатне яходить се чееренть ёнов, кона пандо шачтыксэль... Ансяк секе разницась ютксост: чееренть повизе катка, Гавриловонь кондятнэ сынсь эсь пряст чавить.

Москов, ГИЖ. 1929 ие.

  1. Коногон — тупое животное