Пици-палакст/Рудазов ведесь чуди

From Wikisource
Jump to navigation Jump to search
[ 109 ]
РУДАЗОВ ВЕДЕСЬ ЧУДИ


Л
АМО КОРТАМО а карматано, ламонь сёрмадомо а думатано...

Аместь ламо думамс, акона шканеяк ды пек уш ламо материалтнэде: хоть брудь брудяк эйсэст.

Кода уш тевесь теезь и сонзэ берянь ёнксонзо гноень язва лацо кармить пицеме народонть сельтнень — сестэ ломатне кармить кевкснеме вейкест-вейкест:

— Эка амазы язвась! Косто сон появась? Ки чумось тесэ?

Ломатнень ве аршинсэ онкснемс а маштуви, но ломатне вейкецтэ думить ве тевенть коряс: эрьвейкенень охота улемс начальникекс, эрьвейкенень охота эрямс ломанькс — улемс ломань ланксо покшокс, камандувамс ломатнесэ и ваномс ломатнень ланкс верьде алов.

Зярс ломанесь — истяк ломань, зярс сонзэ кавалало арась портфель, сон эри истя-жо, кода весе. Сялды сонзэ ланксо покшнэнь робутаст и эсь пачканзо думи: „монь бу тынк таркас, аистя туевель тевесь!“

Ломатне — весе парт, весе превейть. Лиясто маняви, лиясто маняви нарошной, но ответэзэ вейке:

— Алашань ниле пильгензэ — ито пупорькшни, а минь, вишка ломатне, седеяк.

* * *

Ульяновской окруксо ули Балдасева веле. Эрить тосо эрзят. Икелев пек а капшить, удалов а кадновить. Сэтьместэ, сэтьместэ ютыть чист-вест.

Истяк и эряволь те велесь сэтьместэ, кияк аволь содаяк эйстэнзэ, аволь кучтдеряй тосто ве ломань сёрма. Сёрмась аволь пек покш, но ёвтнесь ламо.

Маны те велесь кочкась эстэнзэ прявт. Прасть [ 110 ]ноготнэ (бобатне) Зинкинэнь ланкс. Кармась Зинкин ветямо Балдась велень тевтнень.

Кулятне истят: Зинкиндэ икеле председателесь ульнесь кулаконь кондямо, ламо, келя, велень ярмакт ютавтнесь, беднякнэнь ломанькс эзь лово.

Надиясь Балдась велесь Зинкин ланкс: те уш ашти минек кис, те уш ветясамизь паро тевс.

Ютась ие. Парсте робуты Зинкин. Таго кочкизь... Омбоце иенть прядызе „пуло марто“. 180 целк. ков бути тусть кассастонть. Месть тейнемс?

Эрзя ломань — чевте седей. Климентич — вадря ломанесь, простямка. И — простизь Зинкиннэнь те растратанть и кочкизь Зинкинэнь таго председателекс. Колмоце иесь допрок лепштизе Зинкинэнь. Стувтынзе Зинкин беднякнэнь.

Зинкиннэнь эрявсь сроямс покш сэдь; Зинкин максызе кулакнэнь. Панць тест 95 целковой. Сроицятне — Баранов, Коргулев и Катаев не ярмакнэнь росходувизь эсь лангозост. Сэдень виренть эйстэ чапсть колмо кудо срупт и микшнить эйсэст 320 целковойде. А сэдесь? Сэдесь колияк мейле тееви. Зинкин теде соды — и, мерят, асодыяк.

Балдась велесэ ули покш сад. Думсесть тееме тосо эйкакшонь площатка. И тевесь думамодо васов эзь туе.

Зинкин тевенть лиякс пурдызе. Сон саизе ды максызе садонть попонтень: бути, келя, попонтень а максомс садонть — садось ёми. Попось ней прок райсэ эри и... озны Зинкинэнь кис.

Балдась велесь пингезэнзэ майсесть сэтьтеме. Те иене велесь кундась сэдень сроямо. Ве сэденть таркас „парт ломать“ сроясть кудо срупт, омбоце сэденть таркас „бабань пеште“. Валагаев Вася кундась сэдень сроямо, получизе 235 целковоень и секе неевтезэ. А сэдь, а Вася.

Истя пупордясь Зинкин. Истя пряды сон колмоце иень робутанзо.

* * *

Но Зинкин аволь ськамонзо. СССР-энть келес Зинкинэнь ламо ялганзо.

[ 111 ] Варштыньдерятано Бугурусланонь округонь Ёга велес — тостояк мусынек Зинкинэнь ялганзо.

Ёга велень советэсь целанек аравтови Зинкин ваксс целанек получасы Зинкинэнь „медаленть“.

Ёгань советэсь ансяк вейке ие робутась — и сёрмадызе эсь лемензэ историяс.

Ёгань советэсь мись сюпавтнэнень комсь тыща колият, вете тыщат ленге, и нолдась кирьга парьганзо кавтосят целк. велень ярмакт.

Минь кодамо берянь тев илястано тее, ответэнек вейке: „Манявинек, манявкснэнь ланксо тонавтнитяно“.

Те ответэсь пек паро, но те ответэсь совавты эйсэнек гробс. Кевейкее иеть уш эрятано ды сроятано эсь масторонок. Пора уш тонадомс манявкстомо эрямо.

Москов, ГИЖ. 1928 ие.