Пици-палакст/Зярдо вешкезеви ракась

From Wikisource
Jump to navigation Jump to search
Зярдо вешкезеви ракась  (1928) 
by Дуняшин, Алексей Васильевич
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 106—108
[ 106 ]
ЗЯРДО ВЕШКЕЗЕВИ РАКАСЬ


И
СТЯК, ВАНТ, аволь пурнавткак Баганя велень промксось, кабу а десятникесь Мирош.

Велень народонть обуцязо содазь кодамо: зярс тердят эйсэст промксос — сельметь икеле весе согласить. Ансяк кенерьть туеме вакстост — мельгат бухадить: „монтеменьгак тосо тевтне теевить, монь навозон апак нарда, эли монь тикшем апак усксе.“ Сыть промксос ниле-вете ломать и решить сынь велень тевтнень. Истямо велень народонть обуцязо.

Но Баганя велень десятникесь Мирошка — ломанесь превей, астяко эйстэнзэ кортыть велесэнть — „Мирошка — эскарь, келезэ уродояк пшти“.

Шкась ульнесь кизэнь аштима ков. Чизэ — празникель. Народ весе аштесь. Конат латало цибилк поцо удость, конат кудо бокава пурнавсть: чулгонить чиньчарамодо ды кортнить теде-тонадо.

— Эй! Промксос моледе!!! — каятоць Мирошкань вайгелесь.

Народось цют-цют сырьгавтынзе пиле прянзо: мень таго промкс, празник чистэ?..

— Эй! Промксос моледе!!! — таго каятоць Мирошкань цябака вайгелесь. — Революция!

„Революция“ валось аламодо пупизе народонть. Эрьвейкень мельс мекс бути лецть 1918—19-це иетне. А Мирошка сы яла малав и малав, и секе тев сеери: революция!

Мень „революция“, кодамо „революция“ — Мирошка киненьгак эзь корта, ансяк кучсь народонть велень советс.

* * *

Промкс кудось пешкець тыц. Баганя велень промкс кудосо зярдояк арасель зняро народ. Кияк мезеяк эзь [ 107 ]сода. Революция валось тандавтызе народонть. Кой-кона сюпавтнэ промксов туимадо икеле мерсть цёраст туртов „кой-мезе“ пурнамс лия таркас, илязо аште те „кой-мезесь“ ломань сельме икеле, ки соды мезе канды вандынь чись?

Ансяк сестэ народонь седейтне эсь тарказост прасть, кода председателесь ушодызе промксонть ды мерсь:

— Атят! Минь течи пурнавинек вана мейсь: СССР-энь келес моли культурной революция. Партиясь ды советской властесь терди эйсэнек походс чопуда-чинть каршо. А кадувдано удалов миньгак. Уш сроятано велезэнек школ семилетка...

Ки бути удало пшкаць:

— Кинь ярмак ланкс панжомс школонть? Небось таго минек кецтэ карматадо налог судрямо?..

И теке мельга кулаконь вайгель:

— Содасынек минь те революциянть: 1919-це иестэ сусикенек парсте теньсекшнызь...

Промкс-кудосонть кепетець шум. Весе кортасть. Веенстнэ мурнесть кулакнэнь, омбонстнэ мурьнесть, сыньськак эсть сода кинь, но шумамс эрявсь.

Ниле-вете част меельсек бизнэсь промксось. Тевенть парсте решизь: семилетка школонть панжомс. Энялдомс Татнаркомпросонть икеле: седе курок тулкадемс те тевенть ды сёксентень панжомс школонть. Помещениясь ули анок.

* * *

Шкась теде мейле ютась байтяк. Баганя велень народось кода бути лиякстомсь улконь промкстонть мейле. Кармасть сеецтэ пурнавкшномо клубов, ловнома-кудов.

Пачкоцть кода а кода те велентеньгак культурной революциянь тевтне-валтнэ. Пачкоцть — ды эсть мать толон-пекш лацо. Пачкоцть — ды кармасть пицеме народонь превтнень. Пачкоцть — ды сокардызь народонть прясто пилькс.

* * *

Шкась яла ютась. Сёксеськак кармась малав само. Баганя велесь получась Наркомпроссто конёв, конань эйсэ ульнесь сёрмадось. „Вопрос об открытии в с. Багане семилетки Татнаркомпросом разрешен положительно“.

[ 108 ] Тевеськак прок тусь хоц. Велень советось кармась анокстамо. Урядызь кудонть, учительтненень кармасть квартира вешнеме, кармасть анокстамо пенк.

Пек покш мельс-паросо аштесть Баганя велень роботникне. Пек кенярцть Баганя велень од ломатне. Инечи лацо учость семилетканть.

Пек учось народось, а се шкане Чистаполясо Баганя веленень анокстасть „гостинець“.

Почтась ускизе те гостинеценть. Сёрмадозь эйсэнзэ: „Чистаполянь УОНО-нть койсэ тынк велес семилетка панжомс а эряви“.

Куть и нусмакацть Баганя велень роботникне, но допрок эсть талакат. Таго конёв Наркомпросов. Тосто таго конёв Баганя велев. Баганясто таго конёв Чистаполяв. Тосто таго конёв и ответэсь секе: школось тынк велесэ улеме а карми.

— Мекс? Кода истя? — кевксни Баганя велесь, — эли УОНО-сь Наркомпростонть покш?

— Минь минськак покштано, минськак прят кантлитяно сяводикс ланксонок... школонть тынк велес а паншсынек...

Таго конёв Казанев. Шкась яла юты: ютась сентябрь, мельганзо — октябрясь. Телеськак кенкш удалов сась.

* * *

Кортыть яла, лиясто мик пеняцить эрзятнень ланкс: арась, келя, сынст активностест, а бажить, келя, сынь валдо-чинтень.

Но чумот ли эрзятне, бути сынст активностест эйсэ повить бюрократнэ? Баганя велень эрзятне пек покш мельсэ кунцесть семилеткань панжомо тевентень, но чумот ли сынь, бути Чистаполянь УОНО-нь „кеме коня“ ломатне Наркомпростонть покшокс тейнить и сынст мельс эзь туе Баганя велесь?

Ней, келя, те тевденть марясь областной комитетэнь эрзянь секциясь. И пек, келя, дивсесь ды кежиявтнесь, мекс те шкас апак панжо Баганясо семилеткась. Секень вант сырьгавтыть од тев. Таго кармить ливтнеме конёвт: Баганясто — Казанев, Казаньстэ — Чистаполяв, тосто — Баганяв.

Эли эщо весть сави сёрмадомс те тевденть?

Москов, ГИЖ. 1928 ие.