Сёксень виреса,
Учихть кафта братт —
Синь народнай вракт.
Шуфттнень фталда синь
Кармасть ванома.
Арды Полють лангс
Кармасть целяма,
Вракне колмоксть ляцсть —
Повсть машинати,
Нилецеда ляцсть —
Полю ялгати.
Ветецеда ляцсть
Шофер цёрать шавсть.
Вракне ласькозь тусть,
Корхтайхть: — „Пенц минь саськ!..
Тя аф фкя ули,
Сембонь ляцендьсаськ!“
Лофтамсь Полюнять
Мази шаманяц,
Шави сидеста
Бодрай сединяц.
Сась сонь ёженяц,
Панжевсть сельмонза,
Вай, пяк сярядихть
Ляценьф кяднянза.
Захар атязе
Пара мяльняса
Моли перенцты, —
Кельгом тевнянцты.
Полюсь няезе
Захар атянянц,
Вирти нолдазе
Сетьме вайгельнянц...
Атясь марязе
Содаф вайгяльнять,
Лоткста музе сон
Веры Полюнять:
— Полю, Полюняй,
Кие обжанзять,
Кодама аеркс,
Лефкскяй, ляцензять? —
Полюсь стакаста
Тарксесь ваймонянц,
Изезь эвфне сон
Кельгом атянянц:
— Идить капатнень...
Ляцить аляснон...
Кяжень пандома
Лядсть синь цёрасна...
Ляцезь кяднянень —
Нянь пчкафтсайне,
Ляды коряньцнон
Вракнень машфтсайне! —
— Изень пеле мон
Ляцинь аляснон!
Тяни ляцьсайне
Бандит цёраснон!
Полюсь эреклась
Кота недяляс,
Шумбра шинцты сонь
Сембе радавасть.
Нинге сяда пяк
Кармась тюрема,
Тигрань шаматнень —
Вракнень кунцема.
Полють ляцинзон
Виреста кундазь,
Аеркс пинетнень
Ляцемс судендазь!
