Ичкиздень масторхня/09
[ 42 ]
| 9.
|
Но тя тевсь лиссь аф аньцек Серафим дядянц ланкса. Тевсь лиссь сембя Алёшинать ланкс, а клёк пяк Алёшинскай колхозть ланкса.
Сявозень мархтонза колма тёжятть сокай ломанень ярмакнень, сятнень, конат улсть кочкафт Трактороценнтрань акцияс, кяшсь кати-ков васень колхозонь организаторсь Егор Михалычсь велень советонь председательсь.
Ошса теенза эрявсь ульмос аньцек кафта-колма ши. Недяляда меля кучсть теенза телеграмма, тоса кармасть пичедьма, кучезь омбоцеть, тоса эзк кучсть нарычнай. Мрдась тячи нарычнайс и азонць, што райколхозсоюзса Егорсь ашель и банкав изь путня ярмакт.
Пузоргоць, жалназевсь Алёшинась. Эрь шиня пуромкс. Сась ошста следователь. Хть инголя сембя Алёшинась корхнесь тя тевть лисемс, што Егорть ошса ули невстац, и хть лама фкя фкянди азонцть — кия сон, кодама сонць лангозонза ванозь, и кодама сонь характероц, а тяни лись кода-бди станя, што киегя мезегя изь сода. И коданга нельзя улсь вешемс киена няезя Егорть невестанц и коста содазь, што сон ули?
Сяс мес тефня улсть тапоряфт, кигава велень советонь члетнень эзда изь вешь арамада вастозонза председателькс. Районцта кучсть од ломань, но Алёшинскай алятьня сонь мархтонза ащийхть кельмоста. Тусть корхтамат, што вов Егорскя сась районцта, а колма тёжятть сокай ломанень ярмакт ухаць.
И нят тефнень ёткса ляць важакфтома, а ненгя сяда пяк аф пякстаф, аньцек тийф колхозсь кармась страчнема.
Вася фкясь макссь заявления колхозста лиси, тоса омбоцесь, тоса эзк кода сязевсь, и кармасть лисема кемоньца, заявленияфтома, ненгя сяс, што сась видьма пинксь и кажнайсь тусь эсь умазонза. Аньцек киветия куд, исть ван тя бедать ланкс и исть вешь лисемода.
[ 43 ]Синь ётксост улсь и Серафим дядят хозяйствац.
Тя валда эвотьфнеф несчастьяса и люпштаф бедаса аля, а сусетня изезь шархкодь, кодама-бди ожесточеннай упрямства мархта якась кутнень ланга и ненгя сяда хмурай, везде корхтась аньцек сяконь-жа: што эряви крдемс, што кда тяни лисемс колхозста, то эста вохси аш ков мольмос. Лядонды аньцек ёрдамс модать и тумос ков няи сельмя, сяс мес ингольдень эряфсь — аф эряф.
Кяденц сонь крдезь Шмакофнень брацна, оцю семьянь алятьня, кунартоннь ялганза партизанскай отрятт вельдя, фкя шиня Серафим дядязень мархта мзярда-бди улсть сязьфт Марциновский полковникть батальёнонц кяцта. Сонь крдезя кяденць велень советонь членць Игошкинць, од, аф кунара явф алянц эзда цёра. И мек пяли сявозя колхозть ширенць Павел Матвеевичсь, конаць тяни, мзярда уйфцть лисема колхозть эзда, кода-бта сембонди назло макссь заявления, штоба примамс сонь колхозу.
Тяфта пуромсь киветия хозяйства. И синь лиссть паксяв видьма аф пяк весялат, но упорнайхть эсь кемя намерениясна — аф тумос уйфтф кистост.
Сембя нять событиятненькса Петькась да Васкась юкстазь несколька шис палаткать. Синь ласьконцть Алёшинав. Сингя исть чая Егорть ланкс, дивасть сетяв Серафим — дядянц упорстванц ланкс и мяк ужяльдезь Иван Михайловичть.
— Тяфтонга эряй цёранят. Полафневийхть ломатьня, — мярксь Иван Михайловичсь, сонць вишкста таргазя качаму, ашкотф газетань гумагаста цыгарканц. — Эряй... полафневийхть. Аньцек кие-ба корхталь Егорть колга, што сон полафтови? Кемя улсь ломанць.
Ляди мялезон кати кода... Илядь. Пачкодьмя кати кодама полустанокс, стрелкатьня шёряфт, крестовинатьня таргафт, фтала кись тапаф, седнясь плхтаф. Полустанкать эса ашель кигава, аньцек вирь. Инголя коса-бди фронт и бокса фронтт, а кругом бандат. И няевсь, што песнова аш и аф ули нят бандатьнень и фронтнень.
Иван Михайловичсь лоткась корхтамода и варжакссь вальмянять эзга, тов, коса якстерста ащи стака грозань дуцятьня
[ 44 ]_p48.jpg)
— Юван дядяй! — юваць теенза Петькась.
— Мезя тейть?
— Ну, вов: «А кругом бандат и пефтема фронтненьди и бандатненьди аш и аф ули песнова», — валста валс азозя Петькась.
— Да... А раз’езць вирьса. Сетьмя. Тунда. Нят-пичужкатьнь самай чирикондайхть. Лисемя минь Егоркать мархта рдазуфтам, ваийхтям, ливсюфтам. Озамя нарнять ланкс. Мезя тиймос?
Вов Егорсь и корхтай: «Юван дяди, минь ингольнок таргафт крестовинатьня и стрелкатьня тапафт, фталнок сець пылхтаф. И шархтам минь колмоця шись меку-васу тя бандицкай вирьть эзга. И ингольнок фронтт и бокованок фронтт. А сембя сяка сясктям минь, а аф кия нябудь». — «Сембя сяка минь, корхтан теенза. Тянь колга кигава аф спорвондай. Но миннь команданеськ броневик мархта кати тя ловушкать эзда лисеви или аф». А сон пышкяць: «Ну аф лисефтям. Ну и мезя кда? Миннь 16-цесь юмай — 28-цесь кить ланкса ляды, 39-цесь. Тийсазь».
Синць сон якстеря шиповниконь тараткя, нюхазя сонь, навазя, ужень блузать петлясь. Пеедезевсь — кода-бта аш и ашель сонь [ 45 ]корязонза часлиф ломатть светт ланкса. Сявозя гайкань панжемать, ваень кядьгонять и яцесь паровозть алу.
Иван Михайловичсь танга лоткась корхтамода, и Петькати, Васькать мархта изь удала кульмос, кода лисевсь броневиксь ловушкать эзда, сяс мес Иван Михайловичсь эзк лиссь суседонь комнатас.
— А кодана Егорть иденза? — аф ламода меля кизефтезя атяня пирфксть фталда. — Синь эздост кафта?
— Кафта, Иван Михайлович. Пашка да Машка. Синь бабаснон мархта ляцть, а бабасна синнь сиря. И пянакуд ланкса ащи — сялонды, и пянакуд ланкста валги — сялонды. Тяфта шинь перьф или озонды, или сялонды.
— Эряволь-ба мольмос варжамс. Эряволь-ба мезя-нябуть тиймос. Ужалхть все-таки итня, — пшкяць Иван Михайловичсь. И кулевсь, кода пирфксть фтала уйфць лякома сонь качаму табаконь цыгаркац.
Шудава Васькась Иван Михайловичть мархта тусть Алёшинав. Терьнезь мархтост Петькать, но сон атказась — мярьксь, што аш мзярда.
Васькась дивандась: мес тяфта Петькати арась аш мзярда? Но Петькась изь карма учсема кизефнемаснон эса, эзк кяшезя вальмять эзда белабрысай вихрастай прянц.
Алёшинаса синь сувасть од председателть шири, но сонь изезь сат. Сон тусь ляйть фталу, лятьф ланкс.
Тя лятьфть инкса молсь пяк лама кяж и тюрема. Инголя лятьфсь улсь явонтф лама участкава, оцю участкась улсь Петунин мельникть. Тоса, мзярда тиевсь колхозсь. Егор Михайловичсь тиезя станя, што сембя тя лятьфсь улсь колхозть. Тяни, мзярда колхозсь страць, ингольтень азорхня анцезь ингольтень участкаснон, и кайсезь сяннь ланкс, што казеннай ярмакнень саламода меля тишень лядьма машинать колхозти районцта сембя сяка аф максазь и лятф урядамать мархта аф тиеви колхозсь.
Но лядыксня 15 куднь колхозникня мездонга изезь вешь калфтомода лятьфть и максомс Петунинти ингольдень участканц. Председателсь крдезя колхозть ширенц, но лама, конат кяжиясть мекпяльдень тевтькса и сокай ломатьня арасть Петунинтькса.
[ 46 ]И Петуниц якай спокойнай, корхнесь, што правдась сонь боксонза и што сон и Москуву туй, а эсь тевонць тийсы.
Серафим дядяц и од Игошкинць ащесть правленияса и сёрмацть кодама-бди бумага.
— Сёрматтам! — кяжиста пшкяць Серафим дядяц, сонць здоровондай Иван Михайловичть мархта. — Синь эсь бумагаснон району кучезь, а минь минцень кучсаськ. Морафтка, Игошкин, цёбярьста-ли минь сёрмадоськ. Сон ломанць бокстонь, и теенза сяда няеви.
Мзярс Игошкинць морафтозя, да мзярс синь обсуждандазь, Васькась лиссь ульцяв и васьфтезя тоса Галкань Федькать, ся рябой цёранять мархта, кона аф кунара тюрсь рыжайть мархта сянкса, што ся дразясь: «Федькась-колхоз — пурхцень шалхка».
Федькась лама интереснайдя азонць Васькати. Сон азондозя, што аф кунара Загрёбин Семёнтть палс баняц, и Семёнць якась и божиндась, што сонь тяфта крвястезь. И што тя банять эзда толсь цють-цють изь ёта колхознай лапазти, коса улсь триерсь и ащесь ароптф сёра видьмя.
Ненгя сон азонць, што тяни колхозсь эряскафни ваныйхть поласта полас. И што мзярда изь кенерь Федькать аляц самода эсь рядозонза, то сон, Федькась, сонць тусь обхоц, а тоса полафтозя сонь мамац, конац сявозя чакормать и тусь ванма.
— Сембя Егорсь, — шумордазя Федькась. — Сон виноват, а миннь ювачнесамязь сембоннь. Сембя тинь, корхтайхть, мастерхтад ломаньс.
— А вдь сон инголя улсь, — пшкяць Васькась.
— Сон и аф инголя, а валда, кода герой улсь. Миннь алятьня тянис коданга толкс аф сявсазь — мезста тяфта сон. Сон тяфта няймос невзрачнай, а кда педи мезс-нябуть, сельмонза тяйнялгадыйхть, пиндолгодыйхть. Азсы-кода керсы. Кодама курок сон лятьфнень мархта шаркстась. Карматам, корхтай, марса лядьма, а озепнень, корхтай, карматам марса и видьма.
— Мес сон тяфтама осаль тев тийсь? — кизефтезя Васькась. — Или вов ломатьня корхтайхть, што кельгоманкса?
— Кельгоманкса свадьбат тиендийхть, а аф ярмакт салсихть, — кяжиясь Федькась. — Кда-ба сембя кельгомаекса ярмакт салселхть, эста мезя-ба улель? Аф, тя аф кельгоманкса, а аф содаса мезенькса... И мон аф содаса, и киегя аф содасы. А ули миннь [ 47 ]тяфтама храмой Сидор. Сиря-ни. Тк сон и вохси, кда уйфтят Егорть колга, сон и аф кулхцонды: «Аш, корхтай, мезегя тяфтама». И аф кулхцонды, шаркстай и кылхтыяй сяда курок боконяс. И сембя мезя-бди мормацяй, мормяцяй, а сонцень сельмя веденза гуворийхть, гуворийхть. Тяфтама блажной атясь. Сон инголя Данил Егоровичть посёлкаса работась. Да сон панезя мезенкса-бди. А Егорсь инксонза арась.
— Федька, — кизефтезя Васькась, — а мес Ермолайсь аф няендеви? Или сон тя кизонда аф кармай Данил Егорочть садонць ванма?
— Кармай. Исяк мон сонь няендия, сон вирьста сась. Ирецта. Сон валда тяфтама. Мзярс марьхня исть кенерь, сон сими. Аньцек сай пинксь, так Данил Егорычсь аф макксси ярмакт теенза винас, и эста сон ваны кятавня да хитрай. Ляди мялезт, кода сон тонь весть палакса?..
— Ляди, ляди, — курок корхтазь пшкяць Васькась, сонць вешсыень юкстафтомс нят аф цебярь тефнень. — Мес тяфта, Федька, Ермолайсь рабочайкс аф моли, мода аф види? Вдь сон вона кодама здоров.
— Аф содаса, — пшкяць Федькась. — Кулие мон, што ненгя кунара мзярда-бди сон, Ермолайсь, дезертиркс тушенць якстерхнень эзда. Тоса вастрокса мзяра-бди ащесь. А сяда меля сон валда тяфтама. То туй ковнябуть Алёшинаста, то кизоти танга сай. Мон, Васька, аф келькса Ермолайть. Сон аньцек пинетьнень мархта цебярь, да и то мзярда ирецта.
Куваць корхнесть цёранятня. Васкаськя азонць Федькати кодама тефть тиендевийхть раз’езть тейса. Азондозя палаткать колга, Серёжкать колга, компазть колга.
— И тиньге теезнок сашендода, — пшкяць Васькась. — Минь теезонт сашентам, тиньгя теезнок сашендода. И тон, и Зипуноф Колькась, и ненгя кия-нябуть. Тон морафтома маштат, Федька?
— Аф ламня.
— И миньгя Петькать мархта аф ламня.
— Школа аш. Мзярда улсь Егорсь, то сон пяк старандась, штоба улель школа. А тяни-ни аф содаса кода. Кяжиясть алятьня — аф школати сашенды.
— Заводонь тийма уйфтийхть и школат тийхть, — басязя сонь Васькась. — Пади кодама нябуть доскат лядыйхть, шочкт, [ 48 ]эськт... Лама-ли школати эряви? Минь мярьктям рабочайхненди, синь и тийхть. Да минь минць карматам лездома. Тинь сашендода теезнок, Федька, и тон, и Колькась, и Алёшкась. Пуроптам марс, мезя нябуть интереснай думондатам.
— Ладна, — согласиндась Федькась. Аньцек модамархнень урядасайнек, так и сатам.
Мрдась колхозонь правленияти, исця сатни Васькась Иван Михайловичть. Иван Михайловичть сон музя Егорть кудонц тейста, Пашкать да Машкать ваккста. Пашкась и Машкась порсть канф теест прянькат и фкя фкян ётазь, азондозь атяти эсь эряфснон и кяжи бабаснон колга.
Гайда, — гай! Гоп-гоп! Цёбярь эряфсь! Манись ваны — гоп-цебярьста. Цок-цок-цок! Щюдерьксня цингордыхть. Нармотьня морайхть. Гайда, кавалерия!
Тяфта ласксь вирь пачк эсь пильгонзон ланкса, крць кядь ичкиздень Сенемя озерть берегонць шири, отважнай и весяла кавалеристс Петькась. Види кяцонза сон кирць или, конац ащесь теенза то мянцеви нагайкакс, то оржа саблякс, керши кяцонза — картузонц кяшф потмосонза компас, конац эряви ванды нипременна вешемс Васькать мархта ся веляфтф шуфтт тейста, коса ваймосесь мзярда-бди Василий Ивановичсь.