Ичкиздень масторхня/08

From Wikisource
Jump to navigation Jump to search
Ичкиздень масторхня  (1933)  by Гайдар, Аркадий Петрович, edited by Кочетков А., translated by Аф содаф (аноним)
8-це главась
Арк. Гайдар. Ичкиздень масторхня. — ОГИЗ Молодая гвардия, Москва, 1933. — стр. 38—42

[ 38 ]

8.

Курок цёратьня ялгаксцть брезентонь палаткать эряензон мархта.

Синь улсть кафоннест. Синнь мархтост улсь понав, кемя пиня, лемць «Вернай». Тя вернайсь охотнайста познакомился Васькать мархта, но Петькать ланкс сон кяжиста урокоц. И Петькась, конац содазя мезенкса лангозонза кяжи пинесь, эзк кяшсь сери копонц фталу, кенянчни сянди, што вернайсь кармай аньцек увама, но аф машты азондома мезя содай.

Тяни целайнь ши цёратьня юмсесть вирьса. Марса геолокнень мархта синь нилхцезь Тихай ляйть берегонзон. Якасть шяйть ланкс и весть мянь ичкизень Сенемя озератнень тейс, ков ненгя мзярдонга исть яка кафоннесть.

Кда куца синнь кизефнезь, ков синь юмсийхть и мезя синь вешийхть, то синь эсь прянь няезь отвецяйкшнесть:

— Минь сёвонь вешеньтям.

Тяни синь содазь, што сёвонь сёвоненди аф ровна. Улийхть сёвотть тащёйхть, улийхть жирнайхть, тяфтапт, конатнень апак пидек можна керсемс пельса, кода туста, ваень печфт. Тихай ляйть шудеманць колга лама суглинкада, лиякс азомс страды сёвонь, шоврдаф песок мархта. Сяда вяря озератьнень тейса повонды сёвонь известь мархта, или мергель, а сяда раз’езть маласа матфт оцю пласаса якстеря — бурай сёвоненнь охрат.

Сембя тя улсь пяк интереснай, ненгя сяс, што инголя цёратьненди няевсь сембя сёвонць фкя лаца. Коськя пингоня синь улсть кода коськя поколхть, а начка пингоня улсь кода туста педякшу рдас. Тяни синь содазь, што сёвонць — тя аф рдас, а сырье, конань эзда кармайхть тийма алюминь, и охотнаста лезцть геолокненди вешеньдемс зрявикс сёвонь породать, няфнезь путондаф кинятьнень и Тихай ляйть шюдерьксонзон.

Курок тядя меля раз’езца лоткафцть колма товарнай ваготт и кодама-бди аф содаф рабочайхть кармасть насыпть ланкс ёряма эщикт, шочкт и доскат.

[ 39 ]
Ичкиздень масторхня (А. П. Гайдар, 1933) p43.jpg

Ся веня взволнованнай цёранятьня куваць исть матодов, кенянцть, што раз’езць уйфни эряма од эряфса, аф шави ингольдень эряфть ланкс.

Сембя сяка од эряфсь аф пяк кенордась самос. Тийсть рабочайхня доскаста сарай. Веляфтозь тов инструментснон, кацть сторож и сембя тусть меки. Цёратьнень улсь пяк аф мялезост.

Мзярда-бди обетта мелень пингоня Петькась ащесь палаткать инголя. Сиря геолоксь Василь Ивановичсь паннесь сязьф щамонц кенерь пакаренц эзда, а омбоцесь, — ся, конац улсь кода якстерь армеецень командир, — мезя бди мерсесь планть колга цыркульса.

[ 40 ]Васькась ашель. Васькать кадозь куца куяронь озафнема, сон вешс самода сяда меля.

— Вов кодама аф цебярь, — мярксь серись, сонць сяряфнесы планть. — Компазфтома — кода кятьфтема. Аф с’емка тиймос, аф карта колга мезя тиймос-мумос. Учт тяни, мзярда лия ошста кучийхть. Сон кырьвясць папирос и кизефтезя Петькать.

— И валда тя Серёжкась тяфтама жулик?

— Валда, — пышкяць Петькась.

Сон якстерьгоц и, штоба кяшемс тянь, комась матф пидема васт велькс, уфай кулуву цяткнень ланкс.

— Петька? — юваць лангозонза Василь Ивановичсь. — Сембя кулуфнень уфайть лангозон. Мезнди тон уфасак?

— Мон думондань... пади, чайниксь, — аф верондазь пышкяць Петькась.

— Тяфтама пси, а сон чайникть, — дивандась серись танга уйфць сянь тийма.

— И мезенди теенза эрявкстомсь тя компазсь? А ненгя атказай, корхтай изия сявондь. Тон-ба азолийть теенза, Петька, кода ялганди: «Макск, Серёжка. Кда тонць кандомонза пелят, дай мон канца». Минь аф кяжиятам и аф пенятам. Тон азк теенза Петька.

— Азса, — пшкяць Петькась, сонць шарфтозя шаманць серить эзда. Но, шарфтомста, сон васьфтезень Вернайть сельмонзон. Вернайсь матф, келептезень лапанзон, лифтезя кяленц и сидеста ваймонь тарксезь, кармась ванма Петькать ланкс, кода-бта корхтай: «Васькафнят-жа тон, браткяй! Мезевок тон Серёжкати аф азондат».

— Да афкукс-ли, што Серёжкась салазя компазть? — кизефтезя Василь Ивановичсь, лоткась стамода и навсесы салмоксть картузонць алгафксс. — Пади, минь минць ков-нябуть наваськ и зеря цёранять ланкс думондатам.

— А тинь-ба вешелесть, — эзк пшкяць Петькась. — А тинь вешендеда, и минь Васькать мархта вешенцаськ. И нарть потмоса вешенцаськ и везде.

— Мезя вешендемс? — дивандась серись. — Мон вдь аная кяцтот компазть, а тон, Василь Иванович, тонць азыйт, што сувамс сонь палаткать эзда юкстая. Мезена тяни вешендемс?

— Монь теень тяни няеви, што мон сонь сявондия. [ 41 ]Цебярьста аф лятфтаса, а кода-бта сявондия, — хитрайста пеедезь, пышкяць Василь Ивановичсь.

— Ляди мялезт, мзярда минь ащемя веляфтф шуфтт ланкса Сенемя озерать берекса. Пяк оцю шуфць. Ащемя и ярхцамя. Изийнь юмафт-ли мон компазть тоса?

— Чудно кати мес, Василь Иванович, — пшкяць серись. — То тон корхтать, што иэийть сявонть палаткать эзда, а тяни вов мезя...

— Мезегя аф чудно, — псиста пшкяць Петькась. — Тяфта тожа эряй. Пяк дажи сидеста эряй: думондат — изийть сявонть, а ванат и — сявондийть. Миньгя Васькать мархта улсь. Тумя минь весть калонь кунцема, вов мон мольмоста кизефнеса: «Тон Васька ёмбла кечкаськятьнень изийть юкста?» — «Ой, корхтай сон, юкстаень». Мырдамя минь меки, вешентям, вешентям, коданга аф мусайник. Тоса варжакстонь мон сонь ожанц ланкс, а синь ожазонза сялкфт. А тон, дяди, корхтат — чудно. Мезегя аф чудно.

И Васькась азонць лия случай, кода косой Генадись шинь перьф вешенць узерь, а узерсь ашесь тяльмоть фтала, и ненгя случай, кода Семён дедазя вешендезя байдиконц, а байдиксь ащесь тяса-жа сельмонзон инголя... Сон корхтась убедительнайста и серись варжаксс Василь Ивановичть мархта.

— Гм... А пажалы, эряви мольмос и вешендемс. Да тинць-ба, цёрат, ласкондельдя коданга и вешендельдя.

— Минь вешсаськ, — охотнайста согласиндась Петькась. — Кда сон тоса, то минь мусаск. Ковга сон эздодонок аф моли. Эста минь — рас, рас, тов сей и непременна мусась.

Тя корхтамада меля, исця уч Васькать, Петькась тусь и азозя, што ляць мялезонза эрявикс тев, пращандась и мес бди пяк весяласта тусь кинять шири ласькома, вишкста комотьнесь пижя нупоньца таватф кочкятьнень ланга, шюдерькснень вельф и панжавнь мархнень — вельф.

Лиссь кинять ланкс, сон няйсь лама меки сай раз’езцта Алёшинскай сокай ломатть.

Синь улсть мезса-бди мутендафт, пяк кяжийхть и вишкста сялонцть, кяцнон яфиязь и корхтаст фкя фкянь ётазь.

Фтала молсь Серафим дядяц. Шамац улсь горяв, ненгя сяда [ 42 ]горяв, эстоть коряс, мзярда лапаз таватксс люпштазень пурхценц и атя мациенц.

Шаманц коряс Петькась шархкоць танга кодама-небуть беда тиевсь.