Quij œucc!
Jump to navigation
Jump to search
| ←D'ora in ora, II° | Quij œucc! (1894) by Passion |
Non inducas in tentationem→ |
Coss'el gh'ha in quij œucc? Cosa gh'è dent
Che mi poss no vardaj
Senza andà fœura asquas de sentiment?
Gh'è ona lûs, on barbaj
Che m'incanta, me stria....
Mi si, per quij duu œucc me dannaria!
E com'hin bej! El mar tutt in tempesta,
El ciel tutt a splendor,
De fior imbalsamada ona foresta,
On abiss tentador,
El sguizz de la saetta
On ragg de luna in d'ona nott quietta.
Tutt gh'è dent in quij œucc! O car Signor,
No, fammi vedè pù!
Hin minga mè.... l'è tropp, l'è tropp dolor!
O lássem sarai sù
Con la mia bocca on dì
E pœu, Signor, te preghi, famm morì!