Non inducas in tentationem
Tas, fa piesè.... no, tires no vesin,
Guárdem minga inscì fiss in di poupœu....
Te vœut tentamm istess che fa el ciappin?
Cosa te gh'et adoss, dimmel, incœu?
No, fatt in là.... fatt in là on ciccin....
Lássem andà la man.... cosa te vœu?....
Te butti i brasc al coll. te foo on basin,
Perdi el giudizzi, car Signor, e pœu?
Ciao, va via.... torna ve' doman....
Speccia on moment.... no, va torna, indree pù,
L'è mej per tutt e duu stà on poo lontan....
Perchè te vet in collera?.... di' sù....
Dio, che torment! cià tocchèmm sù la man....
No, tœu on basin.... ah, ne podevi pù!....