D'ora in ora, II°
A costo de morì de la vergogna
Disperada, avvilida, là ai sò pee,
L'è inutil che ghe pensa... mi bisogna
Che incœu vaga a vedell.... hoo specciaa assee!....
La mia reson l'è inutil che la rogna
Che la me disa − varda coss te fee,
Regordes che de ti nanca el s'insogna,
Pensa che a on'altra lu el deslengua adree.... −
E per quest? Lù l'è lù! Cossa m'importa
De tutt et rest se mi ghe vœuri ben?....
E tanto ben che la reson l'è morta?
Vuj vedej qui bej œucc, vedej almen,
Vuj sentì quella vôs che me trasporta....
Sì, voo a cercall.... nissun, nissun me ten!