Kelka samideani intermixas ica tri vorti, qui rigretinde esas poke tro simila per formo. Vu rifuzas, sive kozo quan on ofras a vu, sive kozo, quan on demandas de vu, sive irga propozo quan on facas a vu. Do rifuzar ne aceptar, o ne koncesar (ne volar donar), o ne admisar, o ne konsentar.
Rekuzar esas teknikal termino di la yurocienco ; on rekuzas judikanto o testo (t. e. on ne aceptas lu, ed on exkluzas lu), en ula kondicioni determinita da la legi, ex. kande la senpartieso di la judikanto o testo esas suspektebla (pro sa relati kun la judikoti, pro sa personal interesti, e c.). Judikanto povas rekuzar su ipsa spontane pro simila motivi, to esas, lu rifuzas funcionar. Kompreneble, ca vorto povas uzesar kun metafora senco en la komuna vivo.
Refutar esas kombatar aserto od opiniono per argumenti, qui nuligas ol o qui pruvas la kontrajo. En proceso, en diskuto, singla partio penas refutar la aserto o pretendo di l’altra. To esas do tute altro kam rekuzar.
Ex. : La Esperantista chefi rifuzis diskutar la reformi ; li rekuzis l’autoritato di la Delegitaro, quankam kelki de li partoprenis sa labori e decidi ; sed nulu refutis la reformi decidita.