Poetische Versuche in westfälischer Mundart/Dat beste Liäwen

(Melodie: „Ein freies Leben führen wir.“)

Dat beste Liäwen hävve wi,
Mütt't wi uss auk wull quiälen,
In frier Luft dao arbeid wi,
Weg met de Fiäderfuxerie,
De Luft draff uss nich schiälen!

Well immer in de Stuovens sind,
Zwaor Mensken sind, doch halve;
Waiht ähr män an en scharpen Wind,
Dann wärd se faortens lamm un blind,
Verstriket Pött vull Salve!

Wat fraoge wi nao Riägen wull,
Un so auk usse Blagen?
Hävv wi män düft'ge Schürteln vull,
Et gäiht der immer in es dull,
Wi hävvt en gueden Magen.

Un wenn et dann so Aobend wäd,
Uss brukt kin Mensk to waigen;
Well män en gued Gewieten häd,
Sin Wiärk dann döht recht flitig nett,
De slöpp trotz Mügg' un Flaigen.