Pitla Storia bibia/N5

←N4

Pitla Storia bibia N angiul anunzieia ai pastri la nascita de Gejù

N6→

No dalonc da Betlem stajovel n valgugn puere pastri, che vardova de nuet si pastrëces. Y cëla n angiul de Die ie cumparì ai pastri y à dit "No ve temëde! Ie v'anunzieie na gran alegrëza. Ncuei iel nasciù tla zità de Davide – a Betlem – l Salvator, che ie Crist, l Seniëur. Y chësc ve dëssa vester per sëni: giaterëis n bambin, che ie nfascià ite y che sta pendù te na cianel."

Y subit s'àl abinà pra l angiul na fola d'autri angiuli, che servësc a Chël Bel Die. I laudova Idie y dijova: "Gloria sibe a Idie lassù aut al ciel y pesc ai uomini sula tiera, che à na bona ulentà."

Po' se n ie i angiuli inò jic su al ciel. Ma i pastri dijova śën un al auter: "Jon tosc nchina a Betlem a udëi, chël che l Seniëur nes à anunzià!" Ëi ie piëi via debota y ie ruvei a Betlem. Iló te na stala ai giatà la Madona y sant Ujep y l bambin Gejù, che fova fat ite cun panuces y stajova pendù te cianel. I pastri ova na gran legrëza y n'i cialova mei assé. Do che i l ova adurà, iesi dac ëuta da si pastrëces laudan Chël Bel Die per dut chël che i ova audì y udù.

Do otodì à l bambin giapà la zircunzijion. L ti ie unì metù inuem Gejù, coche l angiul l ova bele numinà dant si nascita.