Pitla Storia bibia/N31

←N30

Pitla Storia bibia Gejù disc la set ultima paroles y mor sula crëusc

N32→

Gejù disc la set ultima paroles y mor sula crëusc.

L majer preve y truep d'autri Giudieres cuienova Gejù y dijova: "Se tu ies l Fi de Die, vie ju dla crëusc! D'autri n'al salvà, ma sé nstës ne pol se salvé no!" Ma Gejù priova: "Pere perdoni ad ëi, pervia che i ne sà, cie che i fej!"

Nce un di ladrons, che fova unii metui sula crëusc cun Gejù, blestemova Gejù y dijova: "Sce tu ies Crist, po' selvete té nstës y nëus!" Ma l auter ladron l à craunià y à dit: "Nianca tu ne tëmes Idie, a vester tla medema pëina! Nëus giapon, chël che se on merità; ma chësc ne n'à fat nia de mel." Po' à dit l bon ladron a Gejù: "Seniëur recordete de mé, canche tu ruves te ti rëni!" – Gejù i à respundù: "N urità te l diji, che mo ncuei sares tu a paravis cun mé!"

Dlongia la crëusc stajova mpe l'oma de Gejù y chël discepul, che Gejù amova. Gejù à dit a si oma: "Ëila, cëla tlo ti fi!" Y al discepul à dit Gejù: "Cëla tlo ti oma!' Y da chëla ëura mpo à tëut l discepul la Madona pra d'ël. Da mesdì ie l surëdl deventà scur y sëura duta la tiera iel unit n scur, che à durà trëi ëura alalongia. Po' à Gejù svaià adaut: "Mi Die, mi Die, ciuldì m'es arbandunà?"

Puech tëmp do à dit Gejù: "Ie é sëit." Te chela à n saudé duncà na sponga tl ajëi, l'à tucëda sun n fust de cana y ti à dat da bëiber a Gejù. Canche Gejù à abù tëut l ajëi, àl dit: "L ie cunsumà!"

Po' à cherdà Gejù drët adaut: "Pere, te ti mans racumandi ie mi Spirt!" Do chësta paroles al nchinà l cë y ie spirà.

Y cëla śën! L drap dl templ s'à zarà a mez ju; la tiera tremova, i crëps se sfendova, la fosses di morc se giauriva y truep corps di Sanc ie ressuscitei, do che Gejù ie ressuscità. – L cumandant y i saudeies, che fajova guardia a Gejù, se temova śën. Ëi dijova: "Vëiramënter chësc uem fova giust, l fova l fi de Die!" Ma nce l popul se batova l piet y zënza dì parola iel dat ëuta a Gerusalem, a cësa.