Pitla Storia bibia/N25
| ←N24 | Pitla Storia bibia Gejù vën cundanà a mort dal sinedrio |
N26→ |
Gejù vën cundanà a mort dal sinedrio.
La trupa de saudeies y l'autra jënt à menà Gejù dant al majer preve, che ova inuem Caifa. Iló s'ova nce abinà i uemes dl sinedrio. L majer preve y dut l sinedrio criva testemonesc fauc contra Gejù per pudëi l cundané a mort. Ma i ne n'ie stac boni de n giapé un.
Śën ie levà su l majer preve y à dit a Gejù: "Ie te scongiure pra Idie, che viv, che tu nes dijes, se tu ies Crist l Fi de Die."
Gejù à respundù y à dit: "Sci, ie l son."
Te chëla à zarà l majer preve si guant y à dit: "Cie adurvons nëus mo testemunianzes. Ëis pu audì, che l à blestemà Idie? Cie ve pèr pa?" Duc canc à po' svaià: "L ie culpeivel de mort."
Po' ài menà Gejù demez y l à tenì n custodia, nchina sula duman. Ma nianca de nuet ne ti lasciovi pesc no; i fanc de suneria cuienova Gejù; ëi ti spudova tl mus, i ti petova de pugnes, i ti ciulova i uedli y ti dajova stlafes sula masseles y dijova: "Endevina, chi che t'à petà?" Ël i tramentova a uni maniera.
Śën ti muiovela a Giuda d'avëi tradì l Seniëur. Ël i à inò purtà la trënta munëides d'arjënt ai majeri prevesc y à dit: "Ie é fat picià, che é tradì sanch inozënt." Ma i majeri prevesc i à po' respundù: "Cie nes n va pa chësc a nëus? Pënsa tu!" Sun chësta à Giuda scirmà i dinei tl templ, ie jit a tò na corda y s'à apicà.