Pitla Storia bibia/N23

←N22

Pitla Storia bibia Gejù sua sanch sul mont ulivet.

N24→

Gejù sua sanch sul mont ulivet.

L malan ova dat ite a Giuda, che fova un di dodesc "apostuli, de tradì si maester. Giuda ie jit dai majeri prevesc di Giudieres y à dit: "Cie ulëis me dé, sce ve mëine Gejù te vosta mans?" Ëi i à mpermetù trënta munëides d'arjënt. Giuda à aconsentì.

Gejù ie śën jit cui autri undesc apostuli la sëira dan si mort sul mont ulivet. Iló fovel n verzon, che se tlamova Getsemani. Te chësc verzon ie jit ite Gejù y à dit ai apostuli: "Vo sentëve ju tlo, ntan che ie vede plu inite a fé urazion." Menadrë i apostuli Piere, Giacobe y Giuani àl tëut pea plu n ite te verzon.

Śën à Gejù scumencià a deventé descunselà y a zitré. L à dit ai trëi apostuli: "Mi ana ie descunseleda nchina ala mort. Stajëde tlo y vedlëde y fajëde urazion cun mé!" Y Gejù s'à destacà da dëi tan dalonc, che n tira n sas, ie tumà sun si mus y à fat urazion y à dit: "Mi pere, sce l ie puscibl, tue demez da mé chësc chelesc; ma no mi ulentà sibe fata, ma la tia."

N chësta maniera à Gejù prià trëi iedesc. Po' ti iel cumparì n angiul dal ciel y l à renfurzà. Po' iel tumà n angunia; y si suà fova sche gotes de sanch, che tumova ju sula tiera. Ma Gejù priova mo n tòch plu giut y mo plu cun devezion. Y Gejù ie levà su dal'urazion y à dit a si apostuli: "Levëde su y jon! Cialëde, chël che me tradësc, vën adalerch!"