Pitla Storia bibia/21
| ←20 | Pitla Storia bibia Mojé vën deliberà dala mort |
22→ |
21 Mojé vën deliberà dala mort.
I descendënc de Giacobe tl Egit ie deventei n gran popul. Giacobe ova giapà da Idie l'inuem "Israel". Davia de chël si tlamova si descendënc mutons d'Israel Israelic. Nce "Ebrei" ti dijovun.
Ntant ie unì n auter rë tl Egit. Chësc tratova mel i Israelic y i sfurzova a fé lëures de gran fadia. Da dedò à po' cumandà l rë.
a chëi dl Egit y à dit: "Trajëde duc canc i mutons, che nasc pra i Israelic te ruf!"
L fova po' nasciù pra i Israelic n drë blòt pitl mut. Per la gran fede y dal gran bon, che ti ulova, l à i genitores tenì aschendù trëi mënsc alalongia. Ma plu giut ne pudovi l tenì aschendù. Davia de chël à si oma tëut na pitla cësta de ruetes y ti à dat ju largià y reja; po' ala metù ite l pitl mut y à lascià ju la cësta sun ëur de ruf, ulache chersciova la cana. La sor de Mojé stajova da lonc y metova verda per udëi, coche la jirà cun chësc pitl mut.
Chël Bel Die à po' lascià pro, che la fia de Faraon unisse ju dlongia ruf. La à udù chësta cësta y à cumandà, che una de si fanceles vede a la tò. Canche les à abù giaurì la cësta, ales udù là ite n pitl mut, che bradlova. La fia de Faraon s'à menà picià de chësc pitl y à dit: "Chësc ie de segur un de chi pitli mutons di Ebrei!"
La sor de chësc pitl mut s'à fat daujin ala fia dl rë y à dit: "Dëssi pa jì a cherdé na oma ebrea, acioche la tire su chësc pitl!" La fia dl rë à respundù: "Sci, mé va!" – Dut cuntënta sauta chësta muta a dò si oma. La fia de Faraon à po' dit al'oma de chësc pitl: "Tue chësc pitl mut y tiremel su! Ue pa bën te dé paiamënt per chël!"
L'oma à tëut chësc pitl mut y l à trat su. Canche chësc pitl fova majer, l ala purtà dala fia de Faraon. Chësta po' à tëut su 1mut per si fi y à dit: "L dëssa avëi inuem Mojé, pervia che ie l é trat ora dl'ega."