ರಾವಣನ್ ಕೆರ್ಯೆ. ಕರ್ತೃ ವಿಶೇಷಣ ನಾಮಪದಲೆನ ದುಂಬುಡು ಉಂತುದುಳ್ಳ.
ಸಂಸ್ಕೃತೊಡು ಗುಣವಾಚಕ ಪ್ರತ್ಯಯಲು ಸೇರುವುನಿ ಅತ್ತಾವಂದೆ ಅಯಿಕುಳು ವ್ಯತ್ಯಯ ಕೂಡಾ ಆಪಾ. ಉದಾ: ಪಾವನಃ ಅನಿಲಃ (ಪುಲ್ಲಿಂಗ) ಗುಣವಾಚಕ ಸ್ತ್ರೀಲಿಂಗದ ಮಿತ್ತ್ "ಅಹೋ! ಪಾವನೀ ಭಗವತೀ ಭಾಗೀರಥಿ” ಆಪಿನವುಂಡು. ನನಒಂಜಿ ವಾಕ್ಯ ರಚನೆಡ್ ಗುಣವಾಚಕ ನಾಮಪದದ ಪಿರಾವುಡು ಬನ್ನಗ ಕ್ರಿಯಾಪದೊಟು ವಾಕ್ಯ ಅಂತ್ಯವಾಪಿನ ರೀತಿ ದ್ರಾವಿಡದವು. ಉದಾ: ಸುಂದರ ರಾಮೆ= ರಾಮೆ ಸುಂದರೆ ಆವನಗ, ಆದಿತ್ತೆ ಇನ್ಪಿ ಪೂರ್ಣ ಕ್ರಿಯಾಪದ ವಾಕ್ಯಾರ್ಥ ಪೂರ್ತಿ ಮುಳ್ಪುಂಡು. ಇತ್ತೆಡ್, ರಾಮ ಶೂರೆ +ಆದ್ ಇತ್ತೆ ಇನ್ಪಿ ರೂಪೊಗು ಕಾಲ್ಡ್‌ವೆಲ್ಲ‌ರ್ ಪಣ್ತೆರ್:
"Preposition of adjectives and adverbs change place with noun and becomes a post-position in virtue of its governing a case and finally the sentence is concluded by one all-governing finite verb".
1.65 ಸ್ವರಾನುರೂಪ (vocalic harmony)ದ ಗುಣ ದ್ರಾವಿಡೊಡು ಉಂಡು. ಉದಾ: ತುಳುಟು ಆಯೆ ಬತ್ತೆ (ಎ ಕಾರ), ಆಳ್ ಬಳ್ (ಅ), ಅವು ಬತ್ತ್ಂಡ್ (ಹೃಸ್ವ ಉಕಾರ) ಅಥವಾ ಅವು ಬತ್ತುಂನು (ಉಕಾರ). ಸರ್ವನಾಮೊಗು ಸಮವಾದ್ ಕನ್ನಡ ಭಾಷೆಡ್ ನಾನು ಬಂದೆನು (ಉಕಾರ) ತುಳುಟು ಉತ್ತಮ ಪುರುಷದ ಮಿತ್ತ್ ಸ್ವರಾನುರೂಪ ಇಜ್ಜಂತಿನಲೆಕ್ಕೊ ಉಂಡು. ಉದಾ: ಯಾನ್ ಬತ್ತೆ. ಮುಲ್ಲ "ಬತ್ತೆ" ಇನ್ಪಿ ಪದತ ಎಕಾರ, ಆಯೆ ಬತ್ತೆ ಇನ್ಪಿನಯಿಟುಪ್ಪುನ "ಬತ್ತೆ” ದ ಎಕಾರವತ್ತ್. ಯಾನ್ ಬತ್ತೆ ಇನ್ಪಿನವೆನ್ ಸರಿಯಾದ್ ಗಮನಿಪುಂಡ ಅಯಿಟ್ ಹೃಸ್ವ ನಾಸಿಕೋಚ್ಚಾರ ಉಂಡು. ಸ್ವರಾನುರೂಪ ನಿಯಮದ ಲೆಕ್ಕೊ ಯಾನ್ ಬತ್ತೆನ್ ಆವೊಡತ್ತ. ಕಡೆಟುಪ್ಪುನ ಅನುನಾಸಿಕ ನ್ ಮಾಯವಾದ್‌ ನಾಸಿಕೋಚ್ಚಾರದ ಎಕಾರ ಒಂಜೆನ್ ವಿಶಿಷ್ಟ ಧ್ವನಿಮೆಯಾದ್ ಪಡೆತ್ತ್‌ದುಂಡು. ಅಕ್ಷರ ಪ್ರಕರಣೊಡು ಇಂದೆತ ಮಿತ್ತ್ ವಿವರಣೆ ಕೊರ್ದುಂಡು.
1.66 ದ್ರಾವಿಡೊಡು ಶಬ್ಧಾಂತ ಸ್ವರವಾದಿಪ್ಪೊಡು ಇನ್ಪಿ ನಿಯಮ ಬರವಣಿಗೆಡ್ ತೋಜುಂಡು. ತುಳು ಭಾಷೆ ಪಾತೆರೊದ ಮಟ್ಟೊಡು ಇಪ್ಪುನದಾವರೆ ವ್ಯಂಜನಾಂತ ರೂಪೊಡೇ ಉಳ್ಳ. ಸಂಸ್ಕೃತೊಡು ವ್ಯಂಜನಾಂತ ಶಬ್ಧಲು ವಿರಳ. ತುಳುಟು ನನ ಒಂಜಿ ವಿಶೇಷ ದಾನೆ ಇನ್ನಗ ಶಬ್ಧ ಮಧ್ಯೊಡು ಕೂಡಾ ವ್ಯಂಜನ ಧ್ವನಿಮೆಲು ಇಪ್ಪುವ. ಉದಾ: ಮಾಳ್+ತ್+ದ್=ಮಾಳ್ತ್‌ದ್. ಇಂದೆನ್, ಇಂದೆಕ್ ಇನ್ಪಿ ಪದಲೆಡ್ ವ್ಯಂಜನ ಧ್ವನಿಮೆ ಕಡೆಟಿತ್ತ್‌ದ್, ಅಯಿಕುಳೆನ ಉಕಾರಂತ ಮಳ್ಪರೆ ದಿಂಜ ಕಾಲ
ಬುಧಾನಂದ ಶಿವಳ್ಳಿ
