ᏮᏓᏥᎶᏏ ᎠᏗᎭ, — ᏣᎬᏫᏳᎯ , ᏦᏒ ᎯᏯᏘᏄᎦ! ᎠᏂᏍᎩᎾ ᏬᏤᎮᏍᏗ ᎠᏗᎭ — ᏗᏂᎧᎿᏩᏗᏙᎯ ᎦᎸᎳᏗ ᎠᏁᎯ ᏩᏁᎲ ᏪᎮᏍᏗ! ᏞᏍᏗ ᎤᏲᏉ ᏱᏄᎵᏍᏓᏁᎴᏍᏗ, ᏣᎬᏫᏳᎯ! ᎯᎦᏔᎭ ᏥᎨᏳᎢᏳ ᎨᏒᎢ, ᎠᎴ ᏝᏉ ᎠᎩᏰᎸᏒ ᏥᏂᎦᎥᏉ ᏧᏢᎦ. ᏧᏂᎸᏫᏍᏓᏁᎯ ᏝᏉ ᏱᎬᏩᎦᏔᏂᎯᎭ, ᎠᏎᏃ ᎠᏴ ᏂᎦᎥ ᎦᏥᏍᏕᎸᏗ ᎨᏒ ᏓᏥᏍᏕᎸᎯ ᎬᏅ ᎢᎪᎯᏛ — ᎠᏎᏃ ᎥᏝ ᏴᎦᏥᏍᏕᎸ ᎤᏓᏅᏙᎩ. ᎤᏲᏍᏛᏉ ᏣᎬᏫᏳᎯ, ᎤᎦᎵᏍᏗᏉ ᎯᏯᏓᏅᏓᏗᏍᏓ — ᏍᎩᏍᏕᎸ ᏣᎬᏫᏳᎯ ᏥᏯᏓᏙᎵᏍᏓᏁᎲ ᎯᎠ ᎾᏍᎩ ᎠᎩᎾᏝᎢ.” ᏄᎬᏫᏳᏌᏕᎩ ᎤᎧᎵᏤᎴᏉ ᎤᏓᏅᏛ ᏝᏃ ᏰᎵ ᎬᏩᏁᎢᏍᏗ ᏱᎨᏎᎢ. ᎠᏧᏣ ᎣᏏᏳ ᏄᏪᏒ ᎤᏓᏙᎵᏍᏔᏅ ᎤᏣᏖ ᎤᏓᏅᏖᏔᏁᎢ, ᎾᏍᎩᏃ ᎢᏳᏳᏍᏗ ᎦᏅᎨᏉ ᎤᎵᏰᏗᏍᎨᎢ, ᎠᎴ ᎡᎯᏍᏗᏉ ᎤᏓᏅᏖᎢ, ᎠᎴ ᏧᎦᏌᏬᎸᎯ EᏗ ᎤᏪᏚᎳᏍᏔᏁ ᎤᏂᏏᏗᏱ. ᎳᏫᏅ ᎾᏍᏉ ᎤᎧᎵᏤᎴ ᎤᏓᏅᏛᎢ, ᎠᎴ ᎤᏄᎪᏤ ᎦᎸᎳᏗ ᏭᎩᎳᏫᏎᎢ. ᎤᏒ ᏫᏂᎤᎵᏍᏔᏅ ᏔᎵᏁ ᏚᎪᎵᏰᎴ ᎪᏪᎵ ᏄᎬᏫᏳᏌᏕᎩ, ᎤᏣᏔᏅᎯᏱᏃ ᎾᏍᎩ ᎤᎬᎥᏍᎩ ᎢᎦᎦᏛ ᏓᏓᏂᎸᎨ ᏓᏥᎪᎵᏰᎲᎢ. ᏅᎩᏨᏛᏃ ᏑᎾᎴᎢ ᏭᏴᎸᏉ ᎧᏅᏑᎸ ᎤᎾᏝᎢ ᎠᏯᎥᎢ ᏅᎪᎮ ᎢᎬᏪᏅᏛ ᎤᏓᏁᏟᏴᏛ ᎨᏒ ᏣᎦᎦᏃᏗᏱ. ᎤᏪᎵᎯᏍᏗ ᎠᎴ ᎤᎿᎸᎯ ᎤᏓᏅᏔᏩᏕᎬ ᎬᏂᏳ ᎬᎪᏩᏛᏗ ᏥᎨᏎ ᎤᎧᏛ ᎿᏉ ᎤᎶᏐᏅᎯ ᎨᏎᎢ — ᎠᎴ ᎿᏉ ᎤᏓᏅᏘ ᎠᎴ ᏅᏩᏙᎯᏯᏛ ᎤᏓᏅᏛ ᎬᏂᎨᏒᎢᏳ ᎬᎪᏩᏛᏗ ᎨᏎᎢ, ᎠᎴ ᎤᏓᏅᏛ ᎯᎠ ᏥᏂᎦᏪᏍᎪ ᎾᏍᎩᏯ ᎨᏎᎢ, ᎠᏥᎩᎵᏨᎯ ᎬᏩᏩᏛᏗᏉ ᏅᏩᏙᎯᏍᏛ ᎠᏂ ᎡᎶᎯ.
