— 7 —
DADITE
Assuré ki l’ feme ni va nén raconter ses poennes et ses mizeres a tot l’ monde edon !
GÅRNIR
Tonton m’ kinoxhe bén, ele barbote cwand elle est d’ måle oumeur — çoula arive a tot l’ monde et a vos pus sovint k’ a tote ôte — (so on côp d’ ouy da Dadite) O ! dj’ a del’ frankisté ; dji n’ vis l’ evoye nén dire, c’ est po çoula k’ nos nos veyans si voltî nos deus… edon Dadite !
DADITE
Dji n’ fwai pus atincion a tos vos boignes messaedjes, leyîz m’ påjhûle.
GÅRNIR
Vos n’ fjhez pus atincion et vs m’ avez torade hiné on côp d’ ouy a m’ trawer houte et houte si c’ esteut ene epêye !
DADITE
Vos sondjîz alez, vos sondjîz ; dji n’ prind nén les poennes di vs hiner des côps d’ ouy !
GÅRNIR
Dji l’ a portant bén veyou, mins djans, po n’ nén vs contraryî, metans ki dj’ n’ a rén dit. (i prind l’ plate botaye sol banc) Savez vs bén cwè, po fé l’ påye nos deus : tinez vola li ptite plate, alez s’ nos cweri po dijh çanses, nos boerans bén l’ gote avou Lambert.
DADITE
Dji n’ va nén cweri do peket, mes fiers sont sol feu, i m’ fåt fini m’ bouwêye.
