povus dicar, ke avaro ankore volas sparar, do esas anke sparema. Tamen ni havas tre juste du diversa vorti por du tante diversa nocioni, de qui l’una esas bona e l’altra malbona.
On demandas la difero di ca du konjuncioni (quin Esp. identigis en char). Ol esas bone explikita en Int. Pioniro, no 5, p. 103 (Universala Metodo da HAugg) : « Pro ke introducas dependanta propoziciono, qua kontenas motivo o pruvo por la chefa propoziciono preiranta o sequanta : nam introducas chefa frazo, qua kontenas anke motivo o pruvo, sed nur por preiranta frazo, o tacita penso ». Ex. : Pro ke pluvas, me ne ekiros. — Me ne ekiros, nam pluvas. — Pro ke nivas, me ne ekiros, nam me timas malvarmijar ».
Uli questionas pri la difero di ca du vorti. Preske indikas stando o grado proxima : quaze indikas nur semblo o simileso. Ex. : il esis preske mortinta (il esis tre grave malsana, vundita, e c.) ; il esis quaze mortinta (il esis senmova o pala quale mortinto, o simulis mortinto, sed esis forsan tute sana). Quaze tradukas bone la F. frazeti : pour ainsi dire, en quelque sorte. Preske (F. presque près que, I. pressochè) implikas etimologie l’ideo di proximeso, do di « preske » kompleta realeso o realigo.
Nia germana samideani intermixas ofte ta du verbi, pro ke li tradukesas (parte) per la sama verbo D. unterdrücken. Sed supresar signifikas simple la depreno o la ne-exist-igo di ulo, dum ke opresar implikas ideo di presar, fizike o morale (D. drücken, be-drücken), do di jeno e di molesto. On esas fizike opresata, kande on spiracas kun peno ; on esas morale opresata, kande on « angoras » pro malquieteso, en expekto di malgaya evento od informo ; politike o sociale, la konquestiti povas esar opresata da la konquestanti, la malrichi da la richi, la laboristi da la patroni, e c. En la libera stato nomita Esperantujo, la progresemi esas opresata da la fideli ; sed ici ne sucesas supresar iti !
On questionas, qua de la du vorti esas justa. Kompreneble, la du esas korekta ed uzebla ; sed horlojeto esas kune plu agrabla e plu justa. Nam se la viri portas ordinare sua horlojeto en posho, la virini portas ol diversamode, ex. suspendita per buklo, o quale braceleto, e c. Existas anke horlojeti, quin on suspendas o fixigas
