61. Leaj-že tombe Marj Magdalina i nump Marj, kok arruš jāmmij kuoᵢt vuosta.
62. Numb pejv ku lī mañña peatnicest, čoñkdɵttiš šoᵢrmus pāp’ i farisej Pilat luz,
63. I sarnuš: χer! mij muštjim, tɵt kieles, koᵢs veal leaj jillij, cilkij: mañña kolmɵn pejvest pajjinam.
64. Tɵn-det, pāk rukkɵded jāmmij χavt kolmat pejv rajja, tɵn-det što sū vuopnattij jet lejjiš puoᵢtted i soll’ded sū i sarnɵd olmɵᵢn: son pajjinɵj jāmmiji kɵskɵst. I leańč maᵢnmus mantamuš keaχnap vusmuz.
65. Pilat cilkij sijjit: tist lī vartjam-naᵢl; mɵnned, vartjēkked, maχt tietvette.
66. Sij vuᵢlkiš i pijjiš kaᵢlm luz vartɵjit, i pijjiš keatka pečat.
Koχt-loᵢk’-kavcat algtɵš.
A mañña suvvet mɵnmest, koᵢs nietlest vus-pejv čuvvan, pūdij Marj Magdalina i nump Marj kīcsted jāmmij χavt.
2. I kīč, šɵndɵj šur mand-puštmuš; tɵn-det što Jummel anjel luštlɵdɵj ɵᵢlmest, pūdij i jortij kietk’ χavt uvz-ńaᵢlmest, i ārɵj sū ɵᵢln.
3. Suᵢst leaj ujnem-naᵢl maχt termes-tol i sū āssɵj lejjiš vilkɵd koχt mut.
4. Vartjij surkniš sū i torjestaškūᵢttiš, i čuńčliš maχt jāmmij.
5. A anɣel poᵢnlij sān niez’nij gārra, cilkij: jelled pɵl; tiedam, što tij ocvette poann’šam Isus.
6. Son elleak taᵢst: son pajjinij, maχt cilkij. Mɵnnɵd, kīcstiekke saj, koᵢst Jummel vɵnnɵj.
7. I mɵnned vi̊ktap, cieᵢlked sū vuopnadɵjit, što son pajjinij jāmmijin, i ɵvd-bielt calk tijjit Galilejest: tomb su ujnvette. Kiččed, cilkim mon tijjit.
8. I tovda vɵjtiš jāmmij-kuoᵢdest i pɵlmužɵn i šur rāmmɵᵢn uᵢrc’stiš cieᵢlkeẟ su vuopnaddɵjit.
9. I koᵢs sij vaᵢnciš cieᵢlked sū vuopnaddɵjit, kič Isus pūdij sijjit vuosta, i cilkij: ramšɵtte! I sij puᵢttiš, tāvvɵtɵttiš sū juᵢlgit i koᵢmmerdiš suᵢnne.
10. Tanna sarn sijjit Isus: jelled pɵl; mɵnnɵd cieᵢlked mū vīl͘l͘ižin štobi vaᵢncetiš Galileje: i tombe sij ujn’let mū.