19. Kɵskɵᵢl tɵn, koᵢs son arij suddam sajest, sū kāv vulg’tij suᵢnne cielkeẟ: jel tujjed ni mɵjt tɵn vujk-olm’že; ton-det što muᵢnne aᵢn nāhkrest čotta leaj lossɵd sū bajas.
20. A šoᵢrmus pāp’ i parsomuz’ pajjidiš olmɵᵢt kɵččed Varavva, a majkɵd Isus.
21. Tanna oᵢltij kɵččilij sist: kon kuoᵢtest tātvette, štob mun luoštačim tijjit? Sij cilkiš: Varavva.
22. Pilat sarn sijjit: mɵn šɵt mun tujjam Isuse, ku nɵmdat Xristɵn? Sarneᵢt suᵢnne puk: aᵢn leńč poann’šamańč.
23. Oᵢltij cilkij: mɵᵢntem keaχnvūd son tujjij? A sij veal čōᵢteap čurvuš: aᵢn leńč poann’šamańč.
24. Pilat, koᵢs ujnij, što ij viekket ni mī, a seagatamuš lasnat, vaᵢldij čāʒ i pɵzɵj kīdɵt olmɵ put, i cilkij: im mon leakku vier tan vujk-olmu vɵrest; kīččed tij.
25. I sarnuš puk olmu vuosta i cilkiš, sū vɵr mij ɵl i mij parnɵ ɵl.
26. Tanna luštij sijjit Varavva, a Isus son tāgej i ɵᵢndij poann’šemme.
27. Tanna oᵢltij vuᵢččij vaᵢltiš Isus pretorij siz, i čuᵢñkiš su ɵl puk polk.
28. I jāksiš sū i cākkiš sū ɵl rūpses āssɵj.
29. I paᵢrk’diš vienc cokkɵj rāzest, pijjiš suᵢnne ojv ɵl i ɵᵢntiš suᵢnne voᵢlles kitte trost; i čuńčlɵᵢttiš sū vuosta pulv’ ɵl, luoᵢndɵttiš sū ɵᵢln, sarnɵᵢt: ramšɵd Iūdej car.
30. I čolkuš su ɵl i vaᵢltiš trost i tākkuš sū ojv vuᵢste.
31. I koᵢn luoᵢndɵttiš sū ɵᵢln, jāχsiš sū ɵᵢln rupses āss’jit i tevv’nattiš sū sū āss’je, i lajt’ješkuᵢttiš sū poann’šemme.
32. Koᵢs vɵjtɵš, vuosta pūdij ɵχt Kirine-olmɵš, nɵm mielt Semman; sū pākkɵstɵš kuᵢnted sū rist.
33. I koᵢs puᵢttiš pajka, nɵm mielt Golgofa, mī lī: Kal-saj;
34. Ɵᵢntɵš suᵢnne jukkɵᵢd uksuz, seagɵtamańč seppɵᵢn; i koᵢs kuttɵlɵj, ij tātmɵńč jukkɵᵢd.
35. A su poann’šɵttɵj juoᵢkkiš su āssɵjit i soppuš vuᵢrbit;
36. I arruš, vartjiš su tombe,
37. I pijjiš su ojv ɵl kirj, koᵢst leaj sū vier kirjtamańč: Tāt lī Isus, Iūdej car.
38. Tanna poann’ši̊š sujn kuoχt olmu-koᵢntijit: ɵvt vuoᵢlles-bieᵢlt, a nump činǯ-bieᵢlt.