37. I vaᵢldij mieᵢldes Piedar i kuχtɵd Zevedej ɵᵢlgit, loᵢsvūdeškūdij i tužɵškūdij.
38. Tanna sarn sijjit Isus: mū jiñk loᵢsvūduš soᵢrm nalla, vuoᵢrtlēkkeẟ taᵢst, i valvɵdēkke mujn.
39. I vaᵢnclaᵢstij kreaχa čorlakše, vɵnlɵdij īǯes muod ɵl, ajjestij i sarnɵj: Ečče mū! lečči ojjam nalla, aᵢn man raj mu tat nāp: a ij nuᵢt maχt mon tātam, no maχt ton.
40. I puoᵢttal vuopnaddɵjjit garra, i kavnač sijjit uoᵢdmen, i sarn Pedre: nuᵢt jēppeẟ vajj’mańč valvded ɵvt cās mujn?
41. Valv’dēkke i ajjestēkke, tɵn-det što jēppe vīr’či kūttalmuže. Vujñ valv; a lešk’ vig’temes.
42. Veal ujtlastij numb vār, ajestij i sarnɵj: Ečče mū! lečči ij vaj tat nāp mɵnnɵd raj mū, mū juɣkeanna, aᵢn leńč tū valt.
43. I koᵢs pūdij, kavn sijjit das uoᵢdmen: tɵn-det što sist čelm losniš.
44. I kudij sijjit, ujdij das, ajjestastij kolmat var, i cilkij tɵn-že san.
45. Tanna puoᵢttal īǯes vuopnadij garra, i sarn sijjit: tij paj veal oᵢdvėtte i oññɵdēkke; kič, altnaškūdij cās i olmu ɵᵢlk ɵntlat reahkolmɵᵢt kīdɵᵢt.
46. Koccɵjēkke, vaᵢnclekkep: kič, altnij mū ɵᵢntij.
47. I koᵢs veal son sarnɵj, kič, Iūda, ɵχt koχtamloga sist, pūdij, i sujn jennɵj olmɵᵢt mīkki-vujm i čoltni-vujm šoᵢrmus pāpɵᵢn i olmɵ pārr’samuzɵᵢn.
48. I sū ɵᵢntij ɵᵢndij sijjit tietteẟ, cilkij: kon mon cuklam, tɵt i lij, vaᵢlted sū.
49. I tɵn cās pūdij Isus gārra, i cilkij: ramšɵd, ravvi! i cuklattij sū.
50. A Isus cilkij suᵢnne: paᵢs-vil͘, mɵn-det ton puᵢttik? Tanna puᵢttiš i pijjiš kīdɵᵢt Isus ɵl, i vaᵢltiš sū.
51. I kič, ɵχt sist, kok lejjiš Isusɵᵢn, vujkij kīd, kīzij īǯes miek’, čickij šoᵢrmus pāp pākaldas, i čupɵj suᵢst pieᵢl͘.
52. Tanna sarn suᵢnne Isus: pij māsaᵢt īǯes miek’ sū sajja; tɵn-det što puk, kok vaᵢldet miek’, miekin majkɵjet.
53. Ili jordak, mun im vaj aᵢn ajjestatted mū Ječčan, i son pej mu ɵvte jēnap koχtaplōgit legiōnit aᵢnjelit?
54. Maχt jēres nalla šɵndɵčɵdet kirji, što nuᵢt gɵlk leaj?
55. Tɵn cās cīlkij Isus olmɵᵢt: nuᵢt maχt olmu-koᵢntij ɵl vuᵢl-
