40. Tanna leńǯet koχtest pield’ ɵᵢln; ɵvt valtlat, a nump kuddastal.
41. Koχt meldattij žornovɵ luᵢn; ɵvt valtlat, a nump kuddastal.
42. I nuᵢt valvɵtēkke, tɵn-det što jēppe tied kon cās tij Hospot pōtt.
43. No tan tij tiette, što leńči kuot-χoᵢzjin tied’či, kon vartjem-bāᵢl sul pōtt, tanna son valvɵčij i ij andɵčij kojvɵᵢd īǯes kuoᵢd.
44. Tɵn-det i tijjid galk leajjed valmɵšit; tɵn-det što kon cas jēppeẟ juoᵢrd, pōtt olmɵ ɵᵢlk.
45. Kū lī vujk i milmānas pākaldɵs, kon χoᵢzjin pijij īǯes pākaldɵzɵ ɵᵢln, ɵᵢnted sijjid pormuš vujk bāᵢl?
46. Vuoᵢzes lī tɵt pākaldɵs, kon sū χozjin, poaᵢtmen, kavn nuᵢt tujješemen.
47. Vujkest sarnam tijjit, puk īǯes jelmuž ɵᵢln pej sū.
48. A leńǯi tɵt pākaldɵs keaχn, i cealk īǯes kuoᵢtkest: ij tovda poaᵢd mu χozjin;
49. I alk tākkɵᵢẟ īǯes tovružɵᵢt, i pōrred i jukkɵᵢd jukkɵj-olmɵ-vujm:
50. Tanna pōtt tɵn pākaldɵz χozjin, kon pejv son ij vuoᵢrd, i kon cās ij juoᵢrd;
51. I cuop sū i pej sū ɵvt vōssa licmer-vujm: toᵢmb leńč lojkmuš i paᵢnn-χi̊rraš.
Koχt-loᵢk-vīdat algtɵs.
Tanna ɵᵢlm carvut leńč ɵvt nālla login nijdin, kok vaᵢltiš iǯes tuvsnik’ i vi̊jtiš vuosta vuntme.
2. Sīst lejjiš vīt milmānɵs a vīt miltɵmes.
3. Miltɵmes vaᵢltiš īǯes tuvsnik’, a jet valtmańč mieldes vuj.
4. Milmānɵs-že ɵvtest īǯes tuvsniki-vujm vaᵢltiš vuj īʒes aᵢstiji siz.
5. I kuoᵢs vuntam kuᵢhk ij pōtmańč; tanna puk nokkaškūᵢttiš i uoᵢddeškūᵢttiš.
6. A kɵsk innɵᵢst šɵndɵj čorvmuš: kīč, vuntam pōtt, vi̊jteẟ vuosta suᵢnne.
7. Tanna kocjiš puk tɵk nijd, i vujkijiš īǯes tuvsniki.
8. A miltɵmes cilkiš milmānnɵsɵᵢt: ɵᵢnted mijjit tijji vuj; tɵn-det što mij tuvsnik’ čāckɵdɵdet.
