39. Nuᵢt sārnam tijjit: jieppeẟ ujnest mū anɣeńč rajest, kon jieppeẟ li̊ñke: laoslovmańč puoᵢttij Jummel ni̊ᵢmme!
Koχt-loᵢk-ńeljat algtɵs.
I vuᵢlgij Isus olgas i vāᵢnʒij cērkvest; i pūᵢttin suᵢnne sū vuopnattij čojetet suᵢnne cērkov, māχt leaj tujašamańč.
2. Isus cilkij sijjit: ujneviette, jieppeẟ puk tajt? Vujkest tijjit sarnam: ij kuddu taᵢst kiedj kiedje ɵᵢln! puk leńč murtstalmańč.
3. A koᵢs son ārij Jeleon term ɵᵢln, tanna pūᵢttiš vuopnattij suᵢnne ɵvtsest, kɵččiliš: celk mijjit, koᵢs tāt leńč, i mɵᵢntem lī tū pōtmuš i ēgge kēǯ tomtmuš.
4. Isus cilkij sijjit vuosta: vāredikke tɵn-det, ni-kī ij kēzɵči tijjit reahka.
5. Tɵn-det što jennɵji puoᵢdet mū ni̊m voᵢln, i āᵢlget sarnet: mun leam Xristos, i jennɵjit sij kēzet reahka.
6. Nuᵢt-že kullɵvette tormuži bajas i tormuži sāɣi bajas. Kīččeẟ, jielleẟ suᵢrkestal: tɵn-det što tɵz pukɵd galgɵč leajd; a tāt veal elleak kieč.
7. Vi̊ᵢllijet olmɵ olmɵ ɵl, i cārvut cārvud ɵl; i leńǯet nealgastomuš, kɵb i madd-torjestomuš pajki melt.
8. Tāt veal puk lī kɵb algɵt.
9. Tanna leńǯet ɵᵢnteled tijjid pieχsemuže i koᵢndeškuoᵢdet tijjit; i tij leńǯvette jieppe sāvašamańč pūkɵᵢn olmɵᵢn mū nɵmest.
10. I tanna jennɵje kēzvūdet reahka; i kaᵢnc kaᵢnʒes aᵢlget ɵntled, i jē sāvvošɵškuodet kaᵢnc kaᵢnʒes.
11. I jennɵj kēles-prorokit koccɵjet i kēzet jennɵjit reahka.
12. I zākontemmesvud lasnamuž-det jennɵjin čoackat sāvšamuš.
13. A kī kuondeškoat kēǯe rajja, leńč pasmańč.
14. I tāt carvūd Jevanjeli leńč sāg’tamańč puk mand ɵᵢln, svidētelvūden pūkɵd olmɵd, i tanna poat kēč.
15. I nuᵢt, koᵢs ujnvette kōrasvūddumuž keaχnvūd, mī leaj sarnmańč pɵjjil prōrok Tannil, čoańčmen pɵᵢz sajest (lokkij aᵢn tomt):
16. Tanna kok lī leamańč Judeest aᵢn určet termit;
17. I kī lī kāt ɵᵢln, tɵt jeallas luoštlat vaᵢlteẟ mɵn-ni īǯes pɵrtest;
18. I kī lī pield’ ɵᵢln, tɵt jeallas pońlat māsaᵢt vaᵢlteẟ īǯes āssɵjit.