21. I boždɵttɵj cerkvin, boždat sujn i suᵢst illijin;
22. I boždɵttɵj ɵᵢlmɵᵢn, boždat Jummɵᵢl oltarɵᵢn i sū ɵᵢln ārrɵjin.
23. Kɵvr tijjit, kirj-kīd i farisej, licmier, mɵjt ɵᵢntvette logat vuoᵢs meatest, anisest i tminest, i kuᵢddin mī lī zākonest kallašɵmuš, sudmuš, šig-kuoᵢtkvut i vier: tan gɵᵢlked leaj tujjeẟ, i tɵn ellea kuoddeẟ.
24. Šoᵢkkes lajtij, kok čedvette čuškɵᵢt, a nilvette verbljud!
25. Kɵvr tijjit, kirj-kīd i farisej, licmier, mɵjt čistvette nāᵢpit i juodit olgɵᵢlt, a siskelt sij lie tivd keškmuz i kiellesvūdet.
26. Šoᵢkkes faᵢrsej! čist vūᵢst nāᵢp i juoᵢd sisklas, tɵn-det leńči sij olg-biel puᵢttes.
27. Kɵvr tijjit, kirj-kīd i farisej, licmier, mɵjt lēppeẟ ɵvt nālla pajnam jāmij-kuodij-vujm, kok lēb olgɵᵢlt kīččed moččed, a sīst sij liet tivd jāmij-tavtit i juᵢkke torkmuzɵt.
28. Nuᵢt i tij olg-bieᵢlt lēpped olmɵᵢd kīččed vujk olmɵᵢn, a sīst tivdɵtam licmervūdet i zākonotemesvūdet.
29. Kɵvr tijjit, kirj-kīd i farisej, licmier, tɵn-det tujješeppe jāmij-kuoᵢt prorokit i močideppe vujk-olmɵᵢt jāmij-kiedjijt.
30. I sārnavette: leńǯim mij īčen ječčin pejvid, jep leńǯim ɵvtsańč sijji prorokij vɵrr vāllɵjest.
31. Nuᵢt tij īǯ īǯant pūtt lēppeẟ svēttel, mɵjt tij lēppeẟ tɵjẟ ɵᵢlgi, kok koᵢntiš prōrokit.
32. Tij tivdɵtieppeẟ īǯit jieǯit mieᵢr.
33. Kuᵢvdi, kācklas kuᵢvdij šɵntmuž! maht tij určstēppe ātta sūdɵkeanna?
34. Tɵn-det, nuᵢt, mon vulg’talam tijji gāra prōrokit, i mīll-olmɵᵢt i kirj-kīdit; i tij earrasit koᵢnt’vette, i poannašeppe, a earrasit aᵢlkvētte tākkeẟ tij sinagōgin, i vuojtet vienest vienna;
35. Aᵢnn poatta tijje ɵl puk vujk vɵrr, vāllamańč manda ɵᵢln vujk Āvel vɵrest Sākri, Varaχin ɵᵢlk vɵr rajja, kon tij koᵢndit cerkov i oltaᵢr kɵskest.
36. Vujkist sārnam tijjit, tāt puk poat tāᵢllan šɵnd ɵl.
37. Jerusalim, Jerusalim, kōbɵńč kondɵńč prōrokit i tākk kīdj-vujm, kok lēv vulgɵtamma tuᵢnne! momet vārr tāttɵm mon čuoᵢñkeẟ tū pārnaᵢt, maχt londańč čoñk īǯes ɵᵢlgit sojji volla, i tij jieppe tātɵškoatmańč!
38. Nuᵢt tijjit kuddastal tij pɵrt kōrasen.
