kon daw anó ka makaluloyag sa iya yadto nga mga binutig. Hipos!
Basahon ko iní sa imo, apang lakturán ko ang imo mga tinaga sa
paghigugma agúd indi ka magbatás.
Kag binatak niya ang papel tubtob sa iya mga matá agúd indì makità sang ulitawo ang iya guyá, sinugdan niya ang pagbasa.
"Ang akon..."—indi ko na pagbasahon sa imo ang masunód kay isá ka binutig!—Kag linaktawan sang iya mga matá ang pilá ka dalán. 'Ang akon amáy maluyag nga akó maglakát wala'y sapayán sang akon mga pagpangindi. Hamtong na ikaw, siling niya sa akon, dapat ka magpanumdom sang kaulihian kag sang imo mga katungdanan. Dapat nimo tun-an ang kinaa'am sa pangabuhi, butáng nga indi mahatag sa imo sang imo pungsod, agúd ikaw sa ulihe mangin-mapuslanon. Kon mag-unay ikaw sa akon luyó, sa akon landong, sa siní nga kahimtangan nga napun-an sing mga libóg, indì mo matun-an ang paglantaw sa malayo kag sa adlaw nga mapabay-an ko ikaw manundog ka sa isa ka tanúm nga ginhinambitán sang aton mamalaybay nga si Baltazar: (nabuhì sa tubig, mataktak ang iya mga dahon kon indi gilayón mabunyagán, layungón sang isá ka tión nga kainit). Nakità mo? Isá na ikaw ka pamatan-on kag nagahibi pa ikaw? —Pumilas sang akon balatyagon iní nga pagsabdong kag nagtuad akó sa iya nga ginhigugma ko ikaw. Humipos ang akon amáy, nag-isip kag hinamboy niya ang iya palad sa akon abaga, naghambal siá sa tingog nga nagkurog: "Nagapati ka nga ikaw lamang ang makahibaló maghigugma, nga ang imo amáy wala pagpalanggà sa imo kag walâ pagbatyag nga mahimulág sa imo? Wala pa lang madugay nadulà naton ang imo ilóy; nagapadulong na akó sa katigulangón, sa sinang' panuigon nga nagapangayo sang bulig kag paglipay sang pamatan-on kag, wala'y sapayán ginabaton ko ang akon kamingaw sa pag-isahanon... kag walâ nakon mapakti kon makita ko pa ikaw liwát. Apang dapat akó magpanumdom sang ibán nga mga butang nga dalagkò... Ang kaulihian nagabukás sa imo, sa akon nagatakóp; ang imo mga paghigugma nagapamuskag, ang sa akon nagakalayà; ang kalayo nagadabdab sa imo dugô, kag ang katugnaw nagakamang sa akon, kag sa gihapon ikaw nagahibi kag indi ka makahibaló mag-antos sa karón sa isá ka bwás-damlag nga mapuslanon sa imo kag sa imo pungsod! Ang mga mata sang akon amáy linanas sang mga luhà, lumuhód akó sa iya tiilán, hinakós ko siá, nangayò akó sa iya sing patawad kag ginsingganán ko siá nga handà akó sa paglakát..."
