imo pagbalik may dalá na ikaw nga korona sang mga dahon kag
mga bulak sang kabugaw nga ginbutáng nimo sa akon ulo, kag
gintawag mo akó nga si Cloé,11 sa imo, naghimò ka sing isá sa
mga balagon. Apang kinuhà sang imo ilóy ang akon korona,
nga dinunot niya sang isá ka bató kag ginsimbog sa hinaki nga
amó ang aton ginhugas sang aton ulo; humibi ka kag nagsilíng
ka nga walâ siá makahangóp sang mitolohiya. "Buang nga batà!"
—Sabát sang imo ilóy, "tan-awón mo ugaling kon daw anó kahamót sang inyo mga buhók." Kumadlaw akó, naakig ka, indì ka maluyag maghambal sa akon, kag sa nabilín nga bahin sang adlaw nagpakità ka nga maligdong kaayo, nga akó daw buót man mahibî. Sang aton pagbalik sa banwa nga nagtagîtì ang adlaw, nanguhà akó sang mga dahon sang alibhon nga nagtulubò sa mga higád sang alagyan, ginhatag ko yadto sa imo agúd ibutáng mo sa sulód sang imo kalù agúd indi magsakit ang imo ulo. Nagyuhóm ka kag gin-uyatan ko ang imo kamót kag nag-ayuháy na man kitá.
Si Ibarra nagkadlaw sa kalipay, binuksan niya ang iya kartera kag kinuhà ang isá ka papel nga sa sulód siní naputos ang pilá ka dahon nga maitúm nga layóng kag mahamót.
—Ang imo mga dahon sang alibhon! —Sabát niya sa iya pagtulok. —Amó iní tanán ang ginhatag nimo sa akon.
Siá na man iya gumunot gikan sa iya dughan sing isá ka bulubolsa nga putî nga suklà.
—Ps! —Siling niya nga tinagpi niya ang palad sang ulitawo. —Ayaw pagtandugá; isá iní ka sulát sa pagpaalam.
—Inâ balá ang sinulát ko sa imo sang wala pa akó magtaliwan?
—Nakasulát ka balá liwát sa akon, ginùo ko?
—Kag ano ang ginsiling ko sadto sa imo?
—Madamò nga binutig, pamalibad sang indi maayo nga manogbayád!¹² Sabát sang dalaga nga kumadlaw, nga nagpahangóp
_____________________
(11) Cloé— Ngalan sang isá sang mga tinawo sang bantog nga nobela nga Gresyanhon nga "Dafnis kag Cloé" nga sinulát suno sa ginasugid, sang Dag-on IV, ni Longo. Si Dafnis isá ka bakero nga nagpuyo sa balay sang mag-asawa nga tag-ayop sa iya, nga lunsay man mga bakero, nga nakasagóp sa iya sang lapsag pa siá sa kagulangan. Si Cloé isá man ka pamatan-on nga bakera nga nakita man sa isa ka gikab malapit sa Mitilene sa mga hitabo nga ginapanaysay. Iní sílá nga duhá nagpuluyo sa Lesbos diin silá nagpahaláb sang ila mga karnero,, kag sa ila pagkinabuhi nga umanhon naghigugmaanay silá, nga sang tapos sila makaagi sa mdamo nga kasablagan natigayon nila ang labing mataas nga handum sang ila duhé ka tagipusuon.
(12) Pamalibad sang indi maayo nga manogbayad.—Mga pamalibad ukón katarungan nga malaba sa paglikáw sang pagbayad sang mga utang, ukón sa isá ka bagay sang paggamit nga may liwan nga kahulogán, subong karón, sa pagpamatuod sang iya (ni Ibarra) pag-untat sa pagsulat sa paghigugma,
