Ang pagpalangurog ni Ibarra pumaontat sang pagbasa: ang pamatan-on nangluspi kag tumikangtikang pakadto-pakarí.
—Anó ang ginabatyag mo? Anó ang nahanabò sa imo? — Pamangkot niya sa iya.
—Pinalimot mo akó nga akó may mga hilikutón pa, nga dapat akó maglakát gilayón subong pa-banwa! Bwás pandot sang mga minatáy.
Humipos si María Clara, nalansang sa ulitawo sa pilá ka tión ang iya dalagkò kag madinamguhanon nga mga mata kag, umipô siá sang mga bulak, humambal sa iya nga natandog:
—Nakità ko, indi na nakon ikaw pag-awatón; sa sulod sang pilá ka adlaw magakitàáy kitá liwát! Itungtong ini nga mga bulak sa lulobngan sang imo mga ginikanan!
Sang pilá ka tión sang ulihe, ang ulitawo nanaog sa hagdanan nga gin-updan nanday Kapitán Tiago kag tiyà Isabel, samtang si María Clara nanirado sa iya hulót-halarán.
—Ilihog akó isilíng kay Andeng nga ihandà niya ang balay. kay maabót dirâ silá ni María Clara kag ni Isabel! Maayo nga paglakat! — Siling ni Kapitán Tiago samtang si Ibarra sumakà sa salakyan, nga tumaliwan pakadto sa plasa ni San Gabriel.
Kag sang ulihe, sa paglipay nagsilíng siá kay María Clara nga naghibî sa luyó sang larawan sang Birhen:
—Lakát, pagsindi sing duhá ka kandilà nga tagduhá ka real, ang isá kay Senyor San Roque kag ang isá kay Senyor San Rafael, nga patron sang mga manlulogayaw! Sindihí ang lámpara ni Ntra. Sra. de la Paz y Buenviaje, kay madamò ang mga tulisán. Labing' maayo nga maghinguyang sing apat ka real sa talo kag anum ka sikapat sa lana sangsa magbayad sa ulihe sing mabug-at nga tabís.
