ang mga silak sang bulan maggwâ sa tungâ sang nakawaán sang
madabong nga mga sangá, daw nakità ko ikaw sa alibutod sang
kagulangan subong sang isá ka magalhum, makaluloyag nga lambong nga nagkurog sa tungâ sang kasanag kag sang mga kadulóm
sang kagulangan; kag kon ang pispis sa kagab-ihon magpabatî
sang iya nanuhaytohay nga mga huní, tungód ayhan kay nakità
niya ikaw kag ikaw ang nagpukaw sang iya balatyagon. Hùo,
nagpanumdom akó sa imo! Ang kaalabaab sang imo gugma indi
lamang nga naghatag kabuhi sa akon pagtan-aw sang mga dampog, kag naghatag duág sa yelo! Sa Italia ang matahúm nga langit
sang Italia sa iya kahinlò kag kadalum naghambal sa akon sang
imo mga matá; ang iya nagayuhóm nga mga bahin sang dutà
naghambal sa akon sang imo yuhóm, subong sang mga kawayangán
sang Andalucía nga ang iya kahanginan nahugom sang mga kaamyon, naluntarán sang mga handumanan nga sidlanganon, punô sing
binalaybay kag duág, naghambal sa akon sang imo gugma! Sa
mga gab-i nga may bulan, yadto'ng gintuyó nga bulan, nga nagsakáy ako sa isa ka sakayán sa Rhin, namangkot akó kon balá ang
akon panan-awan walâ magbutig sa akon sa pagtan-aw sa imo sa
tungâ sang mga kahoy nga álamo sa pangpang, sa bató sa Loreláy5
ukón sa tungâ sang mga hanulhanol, nga nag-amba sa tungâ sang
kalinóng sang kagab-ihon katulad sang lanubò nga diwata
sang kalipay sa pagpasadya sang kapung-aw kag kamingaw sadtong' nagubâ nga mga kastilyo!
—Walâ akó makapanglugayaw subong sa imo, walâ akó sing nahibal-an lwás sang imo banwa, Manila kag Antipolo,6— sabát sang lin-ay nga nagkadlaw nga nagpati sang tanan nga iya ginhambal.— Apang kutob sang magsilíng ako sa imo nga paalam kag nagsulód ako sa beateryo, nagpanumdom akó gihapon sa imo kag walâ ko ikaw malimti maskin anó ang isugò sa akon sang akon manogkompesar, nga naghatag sa akon sing madamò nga pagpaantos. Nadumdomán ko ang aton mga paghampang, ang aton pagkinamog sang mga batà pa kitá. Namulot ka sang labing
___________________________
(5) Bató sa Lorelay —Isa ka bató nga nagatindog sing tadlong sa luyó sang suba sang Rhin, sa gintung-an sang Sankt Goar kag Oberwesel sa Alemania, tama ka makatalagam sa mga sakayán nga nagbyahe sa suba, kag ginbantog sa iya nagadaghob nga sabát sa tingog. Ang sugidsogid nahanungod sa makalulomay nga Lorelay, nga dira man nagpuyo, ginsambit sing masunson sang mga bag-o nga mamalaybay, labi na gid ni Enrique Heine, sa isá sang iya labing bantog nga mga binalaybay.
(6) Antipolo— Isa ka banwa sa puód sang Rizal, nga nahamtang sa ibabaw sang bukid nga amó man ang ngalan, nga amó ang labing mataas nga bukid nga nagalibot sa linaw sang Bay. Ini nga banwa nabantugán man sa iya mga busáy nga ang ila mga tubig may lalim sang salsalon.
