546NOLI ME TÁNGERE
—Halín kitá, halín kitá dirí! —Sulit niya nga naglinagatik ang iya mga ngipon sa kahadlok.
—Anó ang imo nakità?
—Isá ka bahoy! — Kibot niya nga nagkurog ang bug-os niya nga lawas.
—Isá ka bahoy?
—Sa ibabaw sang atóp... dapat nga isá ka mongha nga na- gapanipon sang mga baga sa kagab-ihon!
Tumongkàaw ang kinilala sa pagtan-aw.
Sumanag ang isá na man ka panglintì kag isá ka ugát sang kalayo sumisi sang langit, nga nabatián ang makakulogmat nga hugpàas.
—Jesus! — Singgit niya nga nangurós man.
Sa kamatùoran, sa masilì nga kasanag sang kilát nakita niya ang isa ka dagway nga maputî, nagtindog, sa ibabaw sang ali- bubongán sang atóp, nga ang iya mga butkon ginduhol sa langit kag ang iya nawóng nagtanglà, nga daw nagpakitlùoy. Ang langit bumalos sing mga kilát kag mga daguob!
Pagligad sang dagùob nabatián ang masubo nga panaghoy.
—Indi hangin, kundi ang makatilingala nga dagway! —Kibot sang soldado bilang sabát sa pagtum-ok sa iya sang kamót sang iya kaupod.
—Ay! Ay! — Ang lumapós sa hangin sa ibabaw sang gahod sang ulán: ang hangin indi makatabon sa iya hagong sadto'ng matam-is nga tingog nga nagpakitlùoy, nga punô sing kalisód.
Bumanàag na man ang isá ka panglinti nga tuman kasilì.
—Indi, indi bahoy! — Singgit sang kinilala. Nakita ko na man siá; magayón siá katulad sang Birhen... Halín kitá dirí kag isugid naton.
Walâ na pagsulita sang soldado ang pangagda kag nadulà silá nga duhá.
Sin-o ang nagpanaghoy sa tungâ sang kagab-ihon, wala'y sapayán sang hangin, sang ulán kag sang bagyo? Sin-o ang mahadlukon nga birhen, ang asawa ni Jesucristo, nga nagpakigsumpong sa indì mapunggan nga mga kusóg sang kinaugalì kag nagpili sang makakulogmat nga kagab-ihon kag sang hilway nga langit, sa pagpasungáw kutob sa makatalagam nga katàas sang iya mga panumbunganon sa Diwa? Binayàan na balá
