508NOLI ME TÁNGERE
—Hoo, Clarita, apun ang panahong zan mga milagro naglega na: kame na mana kastela ang among genahemo: magtuo sa Birhen kag magalagan ka.(3)
—Ba ba . . baliskad!
Si Kapitán Tiago, nga tubtob nián walâ makakità sing panahón sa paghambal, nagpangahás sa pagpamangkot nga iya ginpamatián maayo ang isabát:
—Kon amó nga, Donya Victorina, nagapati ka nga ang Birhen...
Nahangpan sang pamatan-on nga dalaga nga dapat siá maghalín: nangità sia sing balibad kag nagpalayo, nga nagpanglubaybay sa mga muebles.
Ang pinanghambalán sa siní nga hinun-anon sa mahinay nga paningog lunsay yapatyapat kag dinupak nga indi na bagay nga isambit naton. Tuman na nga isilíng nga sang pagpaalam nila, tanán silá malipayon, kag sang ulihe si Kapitán Tiago nagsilíng kay tiyà Isabel:
—Pahibal-a ang restawran nga bwás mahatag kitá sing isá ka badù! Lakát ka, himusa si María nga ipakasál naton siá sa madalî.
Tinulok siá ni tiyà Isabel nga may kakugmat.
—Makità mo na ugaling! Kon si Gg. Linares na ang aton umagad, masakà kitá kag manaog man sa tanan nga palasyo; mahisà silá sa aton, mapatay silá tanán sa kahisà.
Kag tungód sini nga sang ikawaló ang taknà sang madasón nga gab-i napunô na man sang mga tawo ang baláy ni Kapitán Tiago, lwás lamang nga sa karón ang ila lamang pinangagda amó ang mga katsilà kag mga insik; kag ang tigbabáe gintiglawasán sang mga katsilà nga babáe gikan sa España kag sang mga babác nga pilipinhon.
Didto ang kalabanan sang aton mga kilala: si P. Sibyla, si
P. Salví sa tungâ sang nagkalainlain nga mga pransiskano kag
mga dominiko; ang tigulang nga tenyente sang gwardya sibil,
____________
(3) Magtuo sa Birhen kag magalagan ka - Ang matadlong: Fiate en la Virgen y no corras. Kon sayuran, magtuo ka sa Birhen kag indi ka magdalagan. Baliskad iya ang paghambal ni Donya Victorina.
