SI IBARRA sumaka sa iya hulot nga nag-atubang sa suba, umosdang sia sa isa ka silyon, nga tumangla sa taliwala nga nahumlad sa iya atubangan salamat sa nabuksan nga gawahan.
Ang balay sa atubangan, sa pihak nga pangpang nasug-an sing masanag kaayo kag naglambot sa iya hulot ang masadya nga mga tunog sang mga tulunggon, nga may kwerdas ang kalabanan. Kon abi diutay lamang ang libog sang pamatan-on kag, labi ka mapinanilagon, naluyagan niya ang pagtan-aw sa bulig sang teleskopyo sang nagkahanabo sa amo nga danyag sang kasanag, nakadayaw sia sang isa sang mga makatilingala nga talan-awon, isa sadtong mga larawan nga makatalanhaga nga kon kis-a makita sa dalagko nga mga teatro sa Europa, nga sa mahumok nga mga lanton sang orkesta naggwa sa tunga sang daw nag-ulan nga kasanag, sa daw nagdaludo nga busay sang mga batomaidlak kag bulawan, sa isa ka pagpuni nga sidlanganon, nga nakumbongan sang maaso nga lambong, isa ka diwata, isa ka dwende nga nagtikang nga daw wala pagdapat sa salog, nga ginlibutan kag gin-updan sang masilaw nga ubong: sa iya atubangan nagpamukadkad ang mga bulak, masandukot ang sinaot, buhi ang mga lanton kag ang mga guban sang mga yawa, kadiwatahan, mga tayhii, mga mantiw, mga manunonda, mga anghel kag mga bakero nagsinaot, nagpinatikpatik sang magagming nga mga tambor, nagtininigbaliw kag ang tagsa nagbutang sa tiilan sang diwata sing halad. Nakit-an kuntani ni Ibarra ang isa ka tuman kagayon nga lin-ay, nga kulokawayanon, nga nagpanapot sang makailila nga balayuon sang babaeng’ pilipinhon, sa tunga sang di-hil-ob nga sirkulo nga napasakupan sang tanan nga sari sang mga tawo, nga nagkinumpaskompas kag naghinulagholag sing masadya: didto may mga insik, mga katsila, mga pilipinhon, mga militar, mga pari, mga tigulang, mga pamatan-on, kag iban pa. Si P. Damaso yara sa luyo sang amo nga kagayon; si P. Damaso nagyuhom nga daw isa ka mapalaron; si
