mangin-kaladlawan nga indi mapuslan sang bisan sin-o... Paalam!
Ang mga babae lain man ila sing kaisipan.
—Ayl — Panaghoy sang isa ka babae nga may kaalwan kon maghambal. — Ang mga pamatan-on amo man gihapon sini! Kon abi buhi ang iya maayo nga iloy; ano ang iya isiling? Ay, Dios ko! Kon manghunahona ako nga ang amo man mahanabb sa akon anak, nga may mainit man nga ulo . . . Ay, Jesus! Nahisa ako sa iya namatay nga iloy . . . mapatay ako sa kalisod!
—Apang ako akon indi, — sabat sang isa ka babae. — Indi makahatag sa akon sing kalisod kon ina mahanabo sa akon duha ka anak.
—Ano ang ginahambal mo, Kapitana Maria?5 — Sabat sang nahauna nga gintakop ang iya duha ka palad.
—Luyag ko nga ang mga anak magpangapin sang handumanan sang ila mga ginikanan, Kapitana Tinay; ano ang isiling ninyo kon sa isa ka adlaw, nga ikaw mabalo, mabatian nimo nga may maghambal sing malain sa imo bana, kag ang imo anak nga si Antonio magduko lamang kag maghipos?
—Idumili ko sa iya ang akon bendisyon! — Sabat sang ikatlo, nga si utod Rufa, — apang...
—Dumilian sia sing bendisyon, indi nga mas-a! —Sal-ot sang maalwan nga si Tinay. — Ang isa ka iloy indi dapat maghambal sina . . . apang, wala ako makasayod kon ano ang akon himuon . . . ambot . . . ayhan mapatay ako . . . ikaw . . . indi! Diwa ko! Apang indi na ako maluyag magtan-aw sa iya liwat . . . apang. ano nga mga kaisipan ang sa imo, Kapitana Maria?
—Sa ibabaw sang tanan, — sugpon ni utod Rufa, — ayaw pagkalimti nga isa ka daku nga sala ang magpatupa sang kamot sa isa ka tawo nga balaan.
—Ang handumanan sang mga ginikanan labi nga balaan! — Sabat ni Kpna. Maria. — Wala, bisan ang Papa, labi na gid si P. Damaso nga takos makatampalas sang amo ka balaan nga handumanan!
—Matuod man! — Kibot ni Kpna. Tinay nga nagdayaw sang kaalam sang duha. — Diin ninyo pagpanguhaon ina nga maayo nga mga katarungan?
__________________________
(5) Kapitana Maria — Ang asawa sang pangulo sang banwa ukon sang naglidan nga kapitan. Wala pagtawga nga gobernadorsilyo ukon kapitana nga naglidan, kundi ginatawag nga kapitana kag ginahinambitan ang binunyagan.
