sang ginahimò sang adlaw: sa amó iní nga bagay nagdilag si utod
Diego bisán sa tunga sang labing' dalagkò nga mga santos: —Dirí
may inyo kamó nga patente (masanag) sa inyo mga mata, sa inyo
di-langitnon nga pagkadimapinatihon, ang himpit nga binuhatan
sang Makagagahum sa pagpatalang sang mga dalagkò sa dutà, hùo,
mga utod nakon, patente, patente sa tanán, patente!"
Ang isa ka tawo tumindog nga nagpalangluspad kag nagpalangurog kag nanagò sa isá ka kulompesahan. Isá siá ka manogbaligyà sang mga alák, nga nagtulog kag nagpalanamgo nga ang mga karabinero nangayò sa iya sang patente nga waáy siá siní. Naghalong siá nga walâ gid maggwâ sa iya ginpanagòan samtang nga nagpadayon ang wali.
Mapailubon kag naligwin nga santos, ang imo krus nga kahoy, —(pilak ang iya sang larawan) —ang imo kubós nga panapót nagapadungóg kay dalagangan Francisco nga sa iya kitá mga anák kag mga sumolunod! Kamí magapalapnag sang imo balaan nga kabikahan sa bug-os nga kalibutan, sa tanan nga hilít, sa mga syudad, sa mga banwa, nga wala'y pinilian sa maputî kag maitúm —(pinunggan sang Alkalde ang iya pagginhawá)—nga antusón ang pagdumili sang mga butang sa kaugalingon kag mga pagbatás, ang imo balaan nga kabikahan sang pagtùo kag sang pagtulùohan nga nalupitan sang hinangiban —(A! uyhaw sang Alkalde) — nga nagasakdag sang kalibutan sa pagpanimbangon kag nagapugóng sini nga mahulog sa kaidadalman sang kalaglagan!"
Ang mga nagpalamatî lakip man si Kpn. Tiago nag-amát sa pagpalanguy-ab. Si María Clara walâ pagpamati sa wali; nasayran niya nga si Ibarra yarà malapit kag nagpanumdom siá sa iya, samtang nga nagtulok siá nga nagpanguyáb sang iya abaniko sa isá ka toro sang mga mangwawali, nga may iya sang tanan nga dagway sang diutay nga karabaw.
"Dapat naton tanán sauluhón ang mga Baláan nga Kasulatan. ang kinabuhi sang mga santos kag sa sinâ indi na kinahanglan nga magwali akó sa inyo, mga makasasalà; dapat ninyo mahibalan ang mga butang nga tuman ka malahalon kag kinahanglanon subong sang Amáy namon, labí na gid nga ang kadamoan sa inyo malimot na sinâ kay nagakabuhi kamó katulad sang mga protestante ukón mga erehes, nga walâ pagtahâ sa mga salili sang Diwa, katulad sang mga insik, apang pagasilutan kamó, malain sa inyo, mga pinanubol!"
