—Abá, anó inâ pale Lámaso8 anó inâ!— Kumod ni insik Carlos nga nagtulok nga may kaakig sa mangwawali, nga nagpadayon sa paghambal, nga pumakawas sang isá ka katay sang mga halambalanon kag mga pagpakamalaot.
"Mapatáy kamó sa katapusan nga indi makahinulsol, kabikahan sang mga dìmatinùohon! Ang Diwa nagasilot na sa inyo kutob dirí sa dutà sa mga bilanggòan! Ang mga panimaláy, ang kababaen-an dapat magpalalagyo sa inyo, ang mga punòan dapat magbitay sa inyo tanán agúd indì mapadayon ang binhì ni Satanás sa talamnan sang Ginuo... Si Jesúcristo nagsilíng: Kon may. yarà kamó nga katapò nga malain nga nagadalá sa inyo sa salâ, utda ninyo, kag idap-ong sa kalayo...!"
Si Fr. Dámaso nagpalangurog, nalipatán niya ang iya wali kag ang iya inogpulong.
—Nakabati ka? — Pamangkot sang isá ka pamatan-on nga bumoluthò sa Manila sa iya kaupod.— Utdon mo?
—Siá ang mag-una!— Sabát sang isá nga tinudlò niya ang mangwawali.
Nagahiwaos si Ibarra; tumulok siá palibot sa iya sa pagpangità sang isá ka duog, apang puno ang bug-os nga simbahan. Walâ siá sing nabatián kag walâ man niya makità si María Clara, nga nagsusi sang kwadro sang nabenditahan nga mga kalág sa Purgatoryo, mga kalág sa dagway sang mga lalaki kag mga babae sa mga panit, nga may mga mitra, mga kapelo ukón mga toka (mga tabón) sa ila mga ulo, nga ginbagang sa kalayo kag naghawid sa kordon ni S. Francisco nga indi mabugtò wala'y sapayán sang tuman nga kabug-at.
Ang Espíritu nga balàan nga prayle sa amó nga tulagpak nga pamulongpulong nadulà niya ang kaangtanan sang wali kag nalaktawan niya ang tatlo ka malagba nga hinut-ong nga malain ang iya pagdikta kay P. Dámaso nga nagpahuway anay nga naghapûhapô sa iya mga pinanghambal.
"Sin-o sa inyo, mga makasasalà nga nagapalamatî, ang magdilap sang mga pilás sang isá ka imol kag rubanít nga manogpakilimós? Sin-o? Magsabát kag magbatak sing kamót! Walâ! Nasayran ko na: ang isá lamang ka santos nga katulad ni Diego de Alcalá ang makahimò sinâ: dinilapan niya ang tanan nga
_____________________
(8) Pale Lámaso— Ang insik indi makahibaló magmitiang sang (r) kag "d" kag sang ibán pa nga mga tigbató nga mahagpok mitlangón. Gani nga si insik Carlos "Pale Lámaso" ang iya pagmitiang sang "Pari Dámaso."
