—Nga tawo ka, kapinasahî sa imo nga pispis!— Madagmit nga hinambal ni Fr. Dámaso nga tinulok niya siá nga may katingala. —Nagkarí ka sa imo kaugalingon nga kahigayunan kag sa kabuangan! Daw anó ka makatilingala! Kon may pilá ka tulonan...may duhá ka lamang ka tudlò nga agtang.... madamò ang nakasulat sing subong nga dalagkò nga mga tulon-an! May duhá ka lamang ka tudlò nga agtang....
— Nagsilíng ka, Reb. Padre Dámaso,— madagmit nga bungkag niya sang dominiko nga umutód sang sugilanon,—nga nakapuyô ka sing duhá ka pulò ka tuig sa banwa sang San Diego kag imo gintaliwanan . . . wala ka balá Reberensya malipay sa amó nga banwa?
Si Fr. Dámaso sa siní nga pamangkot, sa paningog nga kinaandan kag daw pasapayán, sa hinali nadulàan sang kalipay kag walâ na magkadlaw:
—Indì! —Langod niya nga mamalá kag hinali nga sumandig sa salandigan sang silyon.
Ang dominiko pumadayon sa paningog nga may kasaklaw gihapon:
—Masakit ang magtaliwan sa isá ka banwa dìín nakapuyô ka sing duhá ka pulò ka tuig kag nakilala na nimo subong sang sotana nga imo ginasuot. Akó lamang, bumatyag sa pagbiyà sa Kamiling, kag inâ nga nakapuyô akó didto sing pilá lamang ka bulan.......apang ginahimò inâ sang mataas nga mga pinunò sa kaayuhan sang mga pumoluyò.... kag sa kaayuhan man nakon.
Si Fr. Dámaso, amó pa lamang nga sa amó nga gab-i pumalibóg gid sing tuman; hinali nga sinumbag niya ang halambuyan sang silyon kag pumosnga sa pagpangusóg nga humambal:
—Kon balá may pagtuluohan ukón walâ, ang buót singganón, kon balá ang mga kura hilway ukón indì. Ang pungsod nagakasamad, nasamad na!
Kag sinumbag niya liwat ang halambuyan sang silyon.
Ang bug-os nga kadak-an, natingala, nagtulok sa gubán: binatak sang dominiko ang iya ulo sa pagtulok sa iya sa ubós sang iya mga salamíng. Ang duhá ka dumoluong nga nagpakadtopakarí dumulog sing makadali, nagtulok silá kag pinagwâ nila diutay ang ila mga ngipon nga matalúm, kag pinadayon ang ila pagtikangtikang.
