ini nga katamad sa aton man kaugalingon nga katamad, sa aton
kakuli kag sa aton paagi sa pagdumala sa kolonya? Naghambal
siá sang ibán nga mga kolonya nga ang ila mga pumoluyò may
amo man nga kalahì...
—Ah! Ang mga kahisà! Pangkutá siní si Gg. Laruja nga nakakilala man sang pungsod, pangkutá siá kon ang kapakok kag katamad sang mga indyo may tupong!
—Sa pagkamatùod,— sabát sang diutay nga tawo nga ginpatungdan.. —Wala ka sing makità sa ibán nga bahin sang kalibutan nga may matamad labí sa indyo, walâ sa ibán nga bahin sang kalibutan!
—Nga labí kapalabisyo, nga labí kadimadinumdumon sang kabalaslan!
— Nga labí ka wala'y tinun-an!
Ang pulá nga pamatan-on nagsugod sa pagmulomulalong sa tanán nga higád nga indì mahamtang.
— Mga ginùo,— siling niya sa manubô nga tingog,-nagasalig ako nga yari kitá sa baláy sang isá ka indyo. Inâ nga mga gining..
—Abá! Ayaw ka magkahangawà! Si Santiago walâ ginabilanga nga isá ka indyo, kag labot pa, walâ siá dirí... bisán dirí man siá. Inâ mga kabuangan lamang sang mga bag-o magabót. Paagiha ang pilá ka bulan; magaliwát ang imo kaisipán kon makakadto ka sa madamò nga pandot kag sináot, makatulog sa mga katre kag makakaon sang madamò nga tinula.
—Amó ayhan ang ginatawag nimo nga tinula ináng' isá ka bungangkahoy nga kaangay sang loto14 nga nagahimò sang mga tawo... nga mga malipaton?
—Anó nga loto ukón anó nga loteriya!—Sabát ni P. Dámaso nga nagkadlaw. —Nagapatik ka sang bombo.15 Ang tinula, utan nga manók kag kalabasa. Anó na kadugay nga nakaabót ka dirí?
—Apát ka adlaw,— sabát sang pamatan-on nga daw namingot.
—Nagkarí ka bilang alagad?
—Indì, ginùo. Nagkarí akó sa akon kaugalingon nga kahinguyangan sa pagkilala sang pungsod.
___________
(14) Loto— Isa ka bungangkahoy, nga ang alák nga mahimo gikan sini, ginasugid nga bug-os makapalimot sa makainum sang iya puloy-an kag mga abyan.
(15) Nagapatik ka sang bombo — Nahima ka nga kaladlawan, nga subong sang isá ka kaladlawan kon ang tawo magpatikpatik lamang sang bombo, nga wala ka sing mapamatian nga ambahanon.
