—Indì balá nga nagsilíng kamó nga hatagan sing dulot ang makakuhà sing labing maayo nga sabát?— Pangutana niya sa tingog nga nagkurog sa kakunyag samtang nga mahalungon nga iya pinihak ang papel sa duhá ka bahin.
—Hùo! Hùo!
—Hanti maayo, iní amó ang akon dulot, — Siling niya nga iya hinatag kay María Clara ang katungâ. Sa banwa mapatindog akó sing isá ka buluthòan sa kabataan nga babáe kag lalaki, iní nga buluthòan amó ang akon dulot!
—Iní igadulot nakon sa makakuha sing labing' malain nga sabát.
—Hantì akó! Sa akon na lang!— Singgit ni Sinang.
Hinatag sa iya ni Ibarra ang papel kag lumakát nga madasig.
—Kag iní, amó ang buót silingón?
Apang ang malipayon nga pamatan-on malayo na kag bumalik sa pagpadayon sang hampang sang ahedres.
Si Fr. Salví pumalapít nga daw pinanglimot sa masadya nga gubán sang mga pamatan-on. Pinahiran ni María Clara ang isá ka bantok nga luhà sang kalipay.
—Hantì nadulà ang kinadlaw kag dumulog ang sinugilanon. Ang kura nagtulok sa mga pamatan-on nga walâ sing naisipán nga ihambal bisán isá ka tagâ; iní silá naghulolát nga maghambal siá kag naghilipos sila.
—Anó iní? —Sa katapusan namangkot sia nga kinuha niya ang librito kag daw tinukî niya ang mga pamihák. "Ang aliling sang kapalaran," isá ka libro sa hampang,— sabát ni Leon.
—Walâ kamó makahibaló nga isá ka salâ ang magpati sa siní nga mga butang? - Hambal niya, nga ginisì niya ang mga pamihák.
Sininggit sa katingala kag sa kalain sang buót kumawas sa tanán nga bibig.
—Labí pa gid nga salâ ang magbuót sa butáng nga indì imo batok sa kabubut-on sang tag-iya! Sabát sa iya ni Albino nga tumindog.—Padre Kura, inâ ang ginatawag nga pangawat kag ang Diwa kag ang mga tawo nagadumilì sinâ.
Tinakop ni María Clara ang iya mga kamót kag tinulok niya nga nagluhà ang nabilín sang amó nga libro nga sang tinión nga nagligad naghatag sa ila sing tuman nga kalipay.
