ANG MGA DAGUOB nagdinagubdob sing masunson, nagsinampawsampaw ang iban, kag ang tagsa ka daguob ginsundan
sang makakulogmat nga ikis-ikis sang kilat: masiling nga sinulat
sang Diwa sa kalayo ang iya ngalan kag ang indi matungkad nga
langit nagkurog sa kahadlok. Ang ulan daw ginbubb kag, ginwaswas sang hangin nga may hagong nga makahalagnop, daw buang
nga nagliwatliwat sing huyop sa tagsa ka tion. Ang mga lingganay bumagting nga ang tingog napun-an sing kahagnop, kag sa
makadali nga kalinong nga binilin sang mabaskog nga mga ngurob
sang wala matalikalai nga kinaugali, ang isa ka masubo nga
panaghoy nga data nagapanumbunganon nagatangis nga mabinakhuon.2
Sa ikaduha nga panalgan sang tore didto ang mga bata, nga nakita naton nga kahambal sang pilosopo. Ang manghod, nga may dalagko nga mga mata nga maitum kag mahadlukon nga nawong, naghimulat sa pagduot sang iya lawas sa iya utod, nga kaangay-angay man niya sing pangguyahon Iwas lamang sang iya panulok nga may labi nga kaligdong kag may pangguyahon nga may labi nga kabubut-on. Lunsay kubos ang ila mga panapot, nga puno sang sinursihan kag tinukapan. Nagpulungko sa isa ka tabion, ang tagsa may gin-uyatan nga isa ka lubid, nga ang iya utbong didto sa ikatlo ka panalgan, didto sa ibabaw sa tunga sang mga madulom. Ang ulan nga ginhuyop sang hangin, nagdangat didto sa ila kag nagpapiraw sang siga sang upos nga kandila, nga nagbaga sa ibabaw sang isa ka daku nga bato, nga gingamit sa pag-ilog sang tunog sang daguob kon Byernes Santo nga ginpaligidligid palibot sa koro.
(1) Masubo nga Panaghoy, nga daw nagapanumbunganon, nagatangis nga mabinakhuon— Sa kinatsila ini nga sari sang pulolungon ginatawag nga “aliteracion,” tungod sa pagsulitsolit sang amo man nga tigbato (a) sa tagsa ka taga sang bug-os nga dalan sang pulong; kag, mabilang man nga “metabola” sa pagtilingob sang nagkalainlain nga mga tinaga sa pagsaysay sang amo man nga panghunahona.
