Jump to content

Page:Mga akdang pampanitikan sa tuluyan (JRNCC, 1961, pangmadlang palimbag).pdf/199

From Wikisource
This page has been validated.



Sino ang nakaaalam, ang iniisip niya, kung sa paraang ito'y mahimok ang kalooban ng babae at ang Diyos ay gumawa ng isang kababalaghan sa pamamagitan ng pagdating niya, at humikayat sa puso. noon? Malalakas na yabag na kanilang narinig ang nagpabago sa kaisipan ng lahat. Ang dalawang magkapatid ay nagsitindig na gulat na gulat at nagkatinginan.

—Ang ingkong —ani Sinag-tala na biglang namutla. Nakikilala ni Sinag-tala ang lakad ng lahat ng mga kamag-anak at mga kaibigan niya.

Nakapako ang kanyang tingin sa pintuan.

ng mga yabag ay naulinigang muli at sa loob ng isang sandali'y lumitaw ang isang matandang lalaki, iyon ding nakita natin sa batong-buhay ng Malapad-na-bato, na dumalo sa libing ni Prinsipe Tagulima.

Nang mamalas ng dalawang magkapatid na babae na siya'y lumalapit na nakangiti at matahimik ang kilos, at nang matiyak nilang siya'y hindi isang multo, ay inabot agad ang mga kamay upang hagkan, datapuwa't sila'y hinaltak niya at niyapos.

Hindi napigilan ng dalawang dalaga ang mga luha at tumangis sila sa kaligayahan.

—Sino ang binatang ito? — ang tanong ng matandang lalaki, sabay turo kay Martin.

Siya'y isang apo ni Gad Sindana,¹¹ —ang sagot ni Sinag-tala, at tinuturuan niyang tumugtog ng kudyapi si Maligaya.

—Ah! —ang bulalas ng matandang lalaki at magiliw na nagpugay kay Martin —si Gad Sindana ay anak ni Gad Tandul na nakilala ko nang siya'y bata pa: siya ang lalong matapang nang kanyang kapanahunan at namatay na puno ng kaluwalhatian at mga karangalan bago dumating ang mga kastila. Maligaya siya!


________

11 Ang Gad o Gat ay isang titulong pangkarangalan o pangkamahalan, katulad ng Kagalang-galang o Maginoo, at siyang pamagat ng ginagamit ng mga maharlikang taga rito nang panahong bago pa umahon dito ang mga kastila.

190