— Hindi tutoo, hindi tutoo, hindi tutoo — ang ulit ng hesuwita
na inilabas ang krusipiho — wala kundi isang Diyos na tutoo, ang
sa amin; ang sa inyo’y isang bulaang Diyos; hindi siya nabubuhay;
at ang patutoo nito ay kaming nagsisisunod sa banal na kautusan
niya; malasin ninyo kung paano kami tinutulungan; malasin ninyo
kung paano kami nananalo sa lahat ng mga labanan, ang aming
mga kawal ay nananalo sa lahat ng mga bulag na sumasamba kay
Satanas; ang Diyos namin, ang Diyos ng mga hukbo ay siyang
tanging tutoo at makapangyayari at si Hesukristo.
Nangangat-labi ang matanda at sumagot nang may himig na galit at may halong paglibak:
— Nananalo kayo sa dahilang kayo’y may mga sandatang lalong mabubuti; datapuwa’t si Maykapal ay si Maykapal. Dakilang Kapangyarihang lumilikha, at hindi sumisira. Ang relihiyon ninyo’y nananaig ngayon — dahil sa lakas . . . darating ang araw na lakas din ang mananaig sa inyong relihiyon.
Ang pagkasabi nito’y lumayo ang matanda.
— Vade, retro, Satana, vade retro! (Hayo sa likod, Satanas, hayo sa likod!) — ang sinimulang pagbubulalas ng binatang hesuwita at sa pamamagitan ng Krusipiho ay gumuhit ng mga kurus sa hangin, samantalang ang matanda’y nawala sa pagbagtas sa mga kawayanan.
At nagsialis na ang ibang indiyo, naiwan ang binatang kristiyano, ang matandang Kachil, at ang Hesuwita.
Namatyagan ng hesuwita ang rosariyong nakasuot sa leeg ng binatang kristiyano, at hinawakan ito sa bisig at tinanong:
— Kristiyano ka ba?
— Opo, padre — ang tugong uutal-utal.
— Sino ang matandang iyon?
— Hindi ko alam, Padre, walang nakakikilala sa kanya.
— Ano ang ginagawa mo ritong kasama ng mga di-binyagan?
— Pumarito ako upang manood lamang, bilang pag-uusisa.
— Pag-uusisa, ang pag-uusisa ay ina ng lahat ng kasalanan: at ang katalona?5
5 Ang Katalona ay siyang pamagat sa mga babaing saserdote o paring babae.
169
