— 9 —
moganots iglofoms len bimalam, e ven ädukob cuki obik se nimalöd, tuigs ämoglofoms laiko e äxänoms so geiliko, das ärivoms jü sil.
— Binos levemik! äsagom reg; ab li-täno?
— Ven älogob atosi, äbeginob xänön in mogabim, de tuig al tuig, jüs änakömob fino in mun.
— Binos levemik, levemik! e li-täno?
— Älogob us vomis bäledik, kels äklinofs zabi. Älonedüpob obi suno lenlogön vomis et, e ävilob getävön al tal. Ab vi! cuk obik imogolom e no umo ätuvob mogabimi me kel ixänob. Kisi ädunoböv nu? Äbeginob täno snobön jalis zaba balimi len votim; somo ämekob lefadi al disön. Neläbiko lefad obik no äbinom säto lonedik; loned fütas kils u fols ädefom nog, sodas äfalob su klif, ko kap obik bivedo e so meköfiko, das kap obik änindlanom jü jots obik in klif.
— Binos levemik, levemik; e li-täno?
— Ämufob so lonedo e so gudiko, das kop oba pädetanom de kap oba, kel äblibom stegön in klif. Ägolob nu foviko al mül e ädeblinob tovieli al sezugön kapi obik se klif.
— Vedos egelo vemikum! äsagom reg; e li-täno?
— Ven ägekömob, ludog gletik ävilom i zugön kapi obik se ston al lufidön omi. Ägivob ome su bäk oma flapi so plobik ko toviel oba, das pened äfalom se kop omik!
— O, no kanos binön vemikum! äsevokom reg; ab kis äbinos pepenöl in pened et?
— In pened et, reg oba, äbinos pepenöl das fat olik ibinom vöno müleladünel lä fatel obik.
— Eneveladol, misalöfikel! äsevokom reg foviko.
— Ah, reg; epölüdol yüli! äsagom jepel takediko.
— Iko-li? Kisi epölüdob?