— 10 —
— No li-isagol, reg oba, das ägivolöv viliko ledomi jönikün olik ute, kel ädunomöv sagön oli: Eneveladol, u: binol neveladel?
— Vo, ägepükom reg, boso kofudik, esagob atosi. As reg mütob befulön kelosi epömetob; sikod odugolobs stükis obik e odälol sevälön ledomi.
Atos äjenos, e jepel ägetom somo ledomi jönikün rega demü vöd bal.
NIMS SEBA
Baonel de Venezia, gab Rinaldi, äfalom du äbinom vöno su yag, in seb keli itegon ko tuigs al fanön nimis foetik. No kanon bitopön oke tlepi mana neläbik; del e neit ifegoloms ya, nendas yuf ikömom. Seb äbinom dagik e dibik. Iblüfom dugolön omi al tuvön tuigis anik, kels ikanoms-la yufön omi al lüvön fanübi omik; ab ililom zi om böseti so selednik e lukanitis so yamik, das no ikinom fovön xämis omik. Dlemöl de jek ipladom oki in smaspad seba.
Del telid Rinaldi äklödom lilön böseti tlidas.
— Yufö! äsevokom foviko ko vög yamik; aikel binol-la, yufolös obi!
Äbinos feilel, panemöl Giuseppe, kel ädugolom foti. Lilölo yamis, kels äjinoms kömön se glun, man äjekom begino; ab sun änänom e äsäkom kim ävokom omi.
— Yagel neläbik, kel efalom in seb at. Binob ya is del e neit. Ag, yufolös obi, begob oli; omesedob oli gudiko.
— Oblüfob yufön oli, ägepükom Giuseppe.
Ädekötom foviko ko gadaneif omik bimalami bigik, ägolom ko om alseb e äsagom:
— Söl yagel, lilolöd gudiko, omekob disön bi-
