— 60 —
Flamads krituba.
Rom eslipom dlimöl du neit ledagik
edugalom Nero omi in yof gagik
e bü lulit bufo lomü egegolom.
Bosi lejekikün timil in vüm polom!
Esuflamom kolüm! e kop lifik su om,
telid läs — ked poso. — E sil älenbludom
fa filalit. Vien ninbladom in flamis
kels bösetik gonoms — zilinegöl lamis
is zü logad voma, is love jot mana,
iso niludälik ta blöt bäledana,
dolo deili in pub lejeklik blinöl,
fidoms jiyunela kloti pepicinöl.
So älüdeilom krit lek’öda fulik!
E nog susilitom teldik sufal nulik,
if in bedi zidom Nero senis koföl
meditöfik, fa kis obinom peyoföl.
Necas.
Pet rabänik.
Mens fol binoms em semöpo.
Balid no nolom, ab no nolom das no nolom: at binom neläbik, koplönolsöd omi.
Telid no nolom, ab nolom das no nolom; ab binom nenolel, tidolsöd omi.
Kilid nolom, ab no nolom das nolom; at binom genial slipel, mekolsöd galön omi.
Folid nolom, ab nolom das nolom, at binom nolel, pogolsöd omi.
Damekob peti ab atamod:
Feilels binoms baluda; koplönolsöd menis at neläbik, bi bemed no binom omes.
Vobels, teluda; tidolsöd nenolelis at, dat no binoms-la neläbik, äsliko feilels baluda.
