— 6 —
vabi omik; ab do ägolom ko spid so gletik, äklödom das blig omik äbinom lenpükön obi e äsevokom: «Nofs! nofs!*» Fino ekömöl su Admiralaplad äbinob visü man lenämik, kel äsagom lenosi, ab kel, na ifulom nami omik ko nif, äjedom oki su ob, e büfo ikanob mosumön dinis valik kels äveadoms obi, ebeginom röbön ko nif logodi obik e pato nudi obik ko näms oma valik.
Äcedob fasedi leno drolik, pato bi stom äbinom so kalodik, e na izugob nami obik se mänedapok, ägivob ome ko pun obik flapi, kel äjedom omi steps bals de ob.
Neläbo u läbo plo ob feilels tel täno änakömoms, kels na ilenlogoms obi du timil, äjedoms okis su ob, e nestü taelam obik ätönoms lamis obik, du man kel idagleipom obi balüdo, äfulom denu nami omik ko nif, e äsif no ävilom sufön bevikodami, äjedom oki denu su ob. Atna, du ägebom nefägi lefulnik oba al jälön obi, äbeginom denu röbön logodi obik ko nif; ab do lams obik pätönoms, lineg obik äbinom libik. Bi äklödob binön vitim de fecen u de ludun sembal, ävokob yufi ko näms oba valik.
Fizir änokömom spido e äsäkom obe in flentapük kelosi ädesidob.
— Benö, söl, äsagob, mekölo blüfi lätik e livölo obi de mans kil, kels ämogoloms letakediko vegi omsik, no li-elogol täno kelosi lumans kil et ädunoms obe?
— Kisi täno ädunoms ole?
— Äröboms logodi obik ko nif. Li-tikol ba, das atos binos fased drolik lä stom so kalodik?
— Ab flen oba gudik, äblöfoms ole düni legletik, fizir ägepükom, du älenlogom obi ko senit gletikün.
— Iko-li?