— 45 —
su ston, e me lit et litabs päfiläboms, kels äfiledoms ko mekad vemik nestü lömib e vien.
Täno äfomoms zileki zi ston blägik, e kanitölo kaniti batonik, äbeginoms danüdön nevifiko.
Äkodos jekam, logön bunön kopamagis et blägik, pedalitöl fa flam litabas omas yelibik.
Äfovoms plägis at selednik du minuts anik, ven ston blägik äbeginom givön malis de muf.
Foviko ämödoms danüdi omsik, e ston, xänöl in lut, ämekom libik hogi de loned mana.
Älogon täno slebi de nelfanög e silef: väp de benosmels liegikün Räbäna äfulom spadi e klil bleinöl ämekom tatopi ko dag neita.
— Divs limödik mütoms pesävon in spad et disatalik! — äsagof jifatel, dlemöl de mufäl, jisonlile ofik.
— Lielobsöd, jifatel, deilob de jek! — ägepükof jipul.
Kopamags blägik äfovoms danüdi omsik, kanitölo batoniko, e ya litabs yelibik äbinoms pekösumöl jü laf.
In zilek, keli ston äfomom, tofs gletik väka äjinoms magön su glun malis selednik.
Sun poso älilon nilön pianiko musigi löflik.
Täno sleb nelfanögik ägivom dugoli yunele pedeköl liegiküno, kel äbleinom ä dub jön omik, ä dub nobastons lemödik klotas omik.
Ko smül ägepükom glidi de pemasekels, kels dalogölo omi, ämufoms litabis, do nen stopön danüdi omsik.
Yunel poso ädudlanom in dag e ädepubom.
Atos äbinos läbik plo jipul kel, penänöl pianiko de jek ofik, ilogedof umo yuneli ka divis omik.
Jifatel tadilo no ideflekof logis de nobastons magifik.
Ventür älabom ya venudi teldik plo voms bofik.
