— 14 —
— Moni limödik vilol en getön? äsäkom tedel.
— Könis silefik teltum, ägepükom Giuseppe.
Atos no äbinos dil balsid völada. Nobastonel, kel no äkonfidom omi, äsagom:
— Etifol diamini at!
— Milö, söl, no binob tifel, ab man snatik; if diamin no völadom könis silefik teltum, givolöd obe täno moni nemödikum.
— Zelado, binol tifel! äsagom denu tedel. Solats pävokoms e man pöfik pädukom al fanüb.
Us päxämelom; äkonom jeni omik, ab natiko nek ävilom klödön omi, e bi gab Rinaldi äbinom penitedöl in ventür at, Giuseppe ämütom pubön komü cödels tatik.
— Konolöd obes jeni olik, äsagom bal cödelas, ab if neveladol pojedol denu foviko in fanüb.
Giuseppe äkonom valikosi.
— Sikod li-esavol gabi Rinaldi?
— Si, söls.
— E li-emekom mosedön oli?
— Si, söls, emekom mosedön obi, keli ebegom sovemo, ven äbinom in seb ko lein, lep e snek.
Cödels, estunik dö kon feilela, äso dö känüd jinik vödas omik, ämekoms pubön leigo gabi Rinaldi.
Ven gab äbinom plisenik bal cödelas äsäkom ome:
— Li-sevol mani et?
Rinaldi äflekom oki al feilel e ägepükom blefo:
— No sevob omi.
— Deno lesagom das esavom lifi olik.
Rinaldi äsmülom te e äsagom denu:
— No sevob omi.
Täno cödels äsagoms okes loviko:
— Man at binom fop u tifel. Omekobs jedön omi denu in fanüb; velat ojonom oki ba ito.
